Nokia 3310’нинг давомчиси ҳамда Nokia 3 ва 5 арзон смартфонлари тақдим этилди

Nokia бренди ҳуқуқига эгалик қилувчи HMD Global компанияси афсонавий Nokia 3310 тугмали телефонининг давомчисини, шунингдек, Android’да ишловчи янги Nokia 3 ва 5 арзон смартфонларини тақдим этди, деб ёзади «Hi-tech.mail.ru».

Nokia 3310 давомчисининг хусусиятлари эълон қилинмади, аммо у суҳбат режимида 22 соат ишлай олади, унга иккита сим-карта ўрнатиш мумкин. Ташқи жиҳатдан телефон жиддий ўзгаришларга учраб, ёшларбоп кўриниш олди. Қора, тўқ сариқ, сариқ, кулранг туслари пайдо бўлди.

Телефон 2017 йилнинг иккинчи чорагидан сотувга чиқади. У 49 евродан сотилади.

Nokia 5 корпуси бутун алюминий бўлагидан ясалган бўлиб, қора, кумушранг, индиго ва мис рангларида чиқарилади. Дисплей остида бармоқ изи сканери жойлашган. Нархи — 200 доллар.

Шунингдек, Nokia 5 5,2 дюймли экран, Snapdragon 430 процессори, 13 мегапикселли асосий ва 8 мегапикселли олд камера, 2 Гб тезкор ва 16 Гб ички хотира (+ microSD), 3000 мА/соат сиғимли аккумуляторга эга.

Nokia 3 корпуси эса пластикдан ясалган бўлиб, металл ромга эга. У 5 дюймли дисплей, МТК 6737 процессори, 13 мегапикселли асосий ва 8 мегапикселли олд камера, 2 Гб тезкор ва 16 Гб ички хотира (+ microSD), 2640 мА/соат сиғимли аккумулятор билан жиҳозланган. Нархи — 147 доллар.

Телефонларнинг барчаси Android 7.1.1 Nougat версиясида ишлайди, Google Assistant овозли ёрдамчисига эга бўлади ва Google Photos фотосуратлар омборидан чексиз фойдаланиш имкониятини қўлга киритади.