Google таркибидаги ҳайдовчисиз автомобилларни бошқариш воситаларини ишлаб чиқувчи Waymo компанияси Uber ва унинг стартапи Otto’ни судга берди, деб ёзади Business Insider. Waymo уларни ўғирланган технологиялардан фойдаланишда айбламоқда.
Сан-Франциско округ судига берилган даъво аризасида Google’да ишлаган муҳандислар жамоаси автомобилнинг атроф-муҳитдаги объектларга нисбатан мўлжал олишини таъминлайдиган лазерли датчик — лидар ишланмасини ўғирлаганлиги айтилади.
Даъвогар ўғирликдан етган зарарни ярим миллиард доллардан зиёдга баҳоламоқда.
Иш фигуранти сифатида Google ҳайдовчисиз автомобиллари устида ишлаган жамоанинг илк аъзоларидан бири — Энтони Левандовски тилга олинган. Тўққиз йиллик иш фаолиятидан кейин, 2016 йил январида у Otto’га асос солди. Олти ой ўтгач, Uber Otto‘ни 680 миллион долларга сотиб олди. Даъвода қайд этилишича, Google’ни тарк этишидан олти ҳафта аввал Левандовски Waymo ишланмалари ҳақидаги маълумотлардан иборат 14 мингта махфий файлларни юклаб олган.
Даъвогар таъкидлашича, Waymo ишланмалари билан «ҳайратланарли даражада ўхшаш бўлган» Uber лидар платаси чизмалари илова қилинган электрон хатга унинг манзили тасодифан тушиб қолиши натижасида ўғирликдан хабар топган.
Uber айбловлар билан танишиб чиққанини ва ушбу масалани «диққат билан кўриб чиқиши»ни маълум қилди.
Изоҳ (0)