Пилатес — америкалик спорт мутахассиси Йозеф Пилатес томонидан госпиталда даволанаётган ярадор аскарлар реабилитацияси учун ишлаб чиқилган машқлар мажмуи. Ушбу машқлар корсет ролини бажарувчи ва тананинг нормал жойлашувини маҳкамловчи мускулларни мустаҳкамлайди. Физиотерапевтлар ушбу тизимни умуртқа поғонаси шикастланишини бошидан кечирган одамларга реабилитация дастури сифатида тавсия қилади. Пилатес, шунингдек, ҳомиладор аёлларга ҳам тавсия этилади, чунки у туғруқдан аввал ҳам, кейин ҳам муҳим ролни бажарувчи бел ва қорин мушакларини сезиларли равишда мустаҳкамлайди.
Фото: «Mamapedia.com.ua»
Комплекс ёндашув
Пилатесда кетма-кетлик билан барча мускулларга ишлов берилади, шунингдек, куч ва чўзилиш машқлари уйғунлаштирилади. Машғулотлар соғломлаштирувчи таъсирга эга: организмнинг барча тизимлари аҳволини яхшилайди, стрессни йўқотади, танадаги оғриқлардан халос этади, уйқуни нормаллаштиради, травма оқибатларини бартараф этади. Албатта, пилатес қоматни ҳам тўғрилайди, ортиқча вазнга қарши курашади.
Барчага мос келади
Пилатес билан жинси, ёши, жисмоний тайёргарлик даражасидан қатъи назар, барча шуғулланиши мумкин. Билимдон пилатес мураббийи биринчи навбатда машғулотга янги келган кишининг саломатлиги ва танасининг ўзига хос жиҳатларини ҳисобга олади, сўнг шунга мос дастур тузади.
Координацияни яхшилайди
Сезиларли натижаларга эришиш учун пилатес тўғри ва чуқур нафас олиш, машқларнинг тўғри бажарилишига эътибор қаратиш, ҳаракатларни танаффуссиз равон бажариш ва мунтазам шуғулланиш каби принципларга асосланади. Пилатес ёрдамида ҳаракатларингиз латиф ва уйғун бўлади, ўз танангизни ҳис қилиш ва тўғри нафас олишни, шунингдек, ёмон кайфият ва салбий фикрлардан озод бўлишни ўрганасиз.
Изоҳ (0)