2017 йил 21 февраль куни Алишер Навоий номидаги Ўзбекистон Миллий кутубхонасида Инсон ҳуқуқлари бўйича Ўзбекистон Республикаси Миллий маркази томонидан «Чўлпон» номидаги нашриёт-матбаа ижодиёт уйи билан ҳамкорликда нашр этилган Ўзбекистонда хизмат кўрсатган журналист Ғулом Мирзонинг «Мустақилликнинг залворли одимлари» номли китоби тақдимоти бўлиб ўтди. Бу ҳақда Инсон ҳуқуқлари бўйича Ўзбекистон Республикаси Миллий маркази «Дарё»га маълум қилди.
Ғулом Мирзо турли долзарб мавзулардаги чиқишлари билан ўзбек ўқувчисига яхши таниш. Истиқлол йилларида унинг «Обод маҳалла – обод мамлакат тараққиёти кафолати», «Конституция ва маънавият», «Конституциямиз – буюк Ҳаёт қомусимиз», шунингдек, «Ўзбекистон конституциявий давлат сари», «Сайловлар ва оммавий ахборот воситалари» ҳамда «Демократик ва халқчил Қомус» (А.Саидов билан ҳаммуаллифликда), «Ўзбекистон Республикаси Президенти сайлови ва оммавий ахборот воситалари» ҳамда «Ўзбекистон Республикаси Конституцияси ва оммавий ахборот воситалари» (С.Хидиров билан ҳаммуаллифликда) каби китоб ва рисолалари нашр этилган.
Муаллифнинг «Мустақилликнинг залворли одимлари» номли тўплами икки китобдан иборат. Тўпламнинг биринчи китоби Ўзбекистон Республикаси давлат мустақиллигининг 25 йиллигига, иккинчи китоб Ўзбекистон Республикасининг Биринчи Президенти Ислом Каримовнинг сўнмас хотирасига бағишланган.
Биринчи китобда муаллифнинг қарийб 25 йил давомида даврий матбуотда эълон қилинган публицистик мақола, шарҳ ва репортажларининг салмоқли қисми жамланган. Иккинчи китобдан ранг-баранг мавзулардаги таҳлилий мақолалар, шунингдек, турли соҳа мутасаддилари ва етакчи мутахассислар билан интервьюлар жой олган. Ҳар икки китоб таркибидаги ўнта фасл, 19 та боб, 203 та мавзу, жами қарийб 1100 саҳифа – буларнинг барчаси кейинги чорак аср давомида турли соҳаларида амалга оширилган эзгу ишларнинг муаллиф имкони даражасидаги холис ва камтарин талқинидир.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)