Ўзбекистон ташқи ишлар вазири Абдулазиз Комилов Ўзбекистон ва Буюк Брнитания ўртасида дипломатик алоқалар ўрнатилганининг 25 йиллиги муносабати билан Буюк Британия ташқи ишлар вазири Борис Жонсонга табрик мактубини йўллади. Бу ҳақда Ўзбекистон ТИВ матбуот хизмати хабар бермоқда. Қуйида мактуб матни билан танишишингиз мумкин.
Мен Сизни муҳим сана — Ўзбекистон Республикаси ва Буюк Британия ва Шимолий Ирландия Бирлашган Қироллиги ўртасида дипломатик алоқалар ўрнатилганининг 25 йиллиги муносабати билан табриклашдан бағоят мамнунман.«Дарё»нинг Telegram’даги расмий канали — @toshqindaryo’га аъзо бўлинг!Ўзбекистон Буюк Британияни муҳим халқаро шерик ҳамда дунёнинг улкан сиёсий, иқтисодий, технологик ва интеллектуал салоҳиятга эга бўлган етакчи ва нуфузли мамлакатларидан бири сифатида қабул қилади.
Ўтган давр мобайнида Сизнинг мамлакатингиз билан ўрнатилган динамик ва тенг ҳуқуқлиликка асосланган муносабатларни юқори баҳолаймиз. Ушбу муносабатлар тарихи қадим замонларга бориб тақалади. Ишончимиз комилки, сўнгги йилларда Ўзбекистонга 40 дан ортиқ Буюк Британия делегацияларининг ташриф буюриши икки мамлакатнинг ҳам ўзаро манфаатли ва конструктив ҳамкорликни янада ривожлантириш тарафдори эканлигидан далолат беради.
Қайд этиш лозимки, бугун мамлакатларимиз ўз янги тарихида муҳим ижтимоий-сиёсий воқеаларни бошдан кечираётган бир пайтда Ўзбекистонда Буюк Британия билан ҳамкорлик қилиш истиқболларига ишонч билан қаралади.
Мамлакатимиз учун муҳим бўлган ушбу даврда Буюк Британия ҳукумати ва халқининг қўллаб-қувватлашини юқори баҳолаймиз ҳамда Сизнинг ўринбосарингиз жаноб Алан Дунканнинг Ўзбекистонга ташрифини икки томонлама муносабатларни янада мустаҳкамлаш борасидаги Буюк Британия самимий қизиқишининг тасдиғи сифатида қараймиз.
Биз ўзаро ташрифлар алмашиш амалиётини давом эттириш, сиёсий мулоқот, парламентлараро ҳамкорлик, иқтисод ва саноат, илғор технологиялар, маданият ва санъат, минтақавий хавфсизлик ва барқарорликни таъминлаш соҳаларидаги Буюк Британия билан шерикчиликни янада изчил ривожлантириш тарафдоримиз.
Аминманки, ўзаро ҳурмат ва томонлар манфаатларини ҳисобга олиш тамойилларига асосланган Ўзбекистон-Буюк Британия алоқалари мамлакатларимиз фаровонлиги ва манфаатлари йўлида бундан-буён ҳам мустаҳкамланади.
Жаноби Олийлари, Сизга бўлган юксак эҳтиромимни қабул этгайсиз.
Самимий ҳурмат билан, Абдулазиз Камилов, Ўзбекистон Республикаси ташқи ишлар вазири
Изоҳ (0)