«Бунёдкор» бош мураббийи Сергей Лушчан мавсум олдидан ўтказилган матбуот анжуманида ҳимоячи Акмал Шораҳмедовнинг жамоадан кетиши борасидаги саволга жавоб бериб, бунда «Ал-Жаиш» шарафини ҳимоя қилаётган Сардор Рашидовни ҳам тилга олиб ўтганди.
Биринчидан, ўнг қанот кучсизланмади. Бу жойда Дилшод Аҳмадалиев ўйнамоқда. У «Ал-Жаиш» билан ўйинда Сардор Рашидовни «еб қўйди». Иккинчидан, Аҳмадалиев кўпчилик айтганидек менинг «ўғлим».Шораҳмедов яхши футболчи, етакчи. Бироқ мен ёшларни майдонга туширишни истаганим учун ҳам у билан хайрлашдик.
Сергей Лушчан, «Бунёдкор» бош мураббийи
Мутахассиснинг бу фикрлари «Бунёдкор»нинг собиқ футболчиси Сардор Рашидовга ёқмади. Қатарнинг «Ал-Жаиш» клуби шарафини ҳимоя қилаётган футболчи Лушчаннинг фикрига ўз муносабатини билдириб ўтди. Бу ҳақда «Championat.asia» нашри маълум қилди.
Сергей Лушчан ОАВга интервью беришдан олдин ичиб олган бўлса керак ва бу табиий хол. Лушчаннинг фикри мен учун кулгули бўлди. Ахир ўйинда фақатгина мен ва Аҳмадалиев ўйнаганимиз йўқ. Бутун бир жамоа — умумий ҳисобда 22 нафар футболчи тўп сурди.Мен бундай интервью беришни аҳмоқлик деб биламан. Профессионал мураббий бундай гапларни айтмаган бўларди. Лушчанни профессионаллар сафига қўшмасдим, энди буни ўзи ҳам исботлаб қўйибди.
Сардор Рашидов, «Ал-Жаиш» аъзоси
Қайд этиш керак, 7 февраль куни «Ал-Жаиш» ва «Бунёдкор» клублари Осиё Чемпионлар лигасининг гуруҳ босқичига йўлланма олиш учун Қатарда ўзаро ўйин ўтказган бўлиб, 120 дақиқа давомида 0:0 ҳисобини ўзгартира олмаганди. Пенальтилар сериясида Сардор Рашидов аниқ зарба йўллай олмади, якунда эса «Бунёдкор» гуруҳ босқичи чиптасини қўлга киритганди.
Изоҳ (0)