Санжар Турсунов жамоаси Шоаҳмедов ва Абдухолиқовдан кейин Сардор Рашидов жамоасини ҳам мағлуб этди

Қатар Юлдузлар лигасининг 21-турига келиб ўзбекистонлик футболчилар ҳаракат қилаётган икки клуб ўзаро тўқнаш келди.

Санжар Турсунов тўп сурадиган «Ал-Ҳарайтият» совринли ўринлар учун кураш олиб бораётган Сардор Рашидовнинг «Ал-Жаиш» клубини қабул қилиб, 2:1 ҳисобида зафар қучди. Беллашувда Турсунов тўлиқ — 90 дақиқа ҳаракат қилган бўлса, Сардор Рашидов 67-дақиқада ўз ўрнини қатарлик футболчига бўшатиб беришга мажбур бўлди.

Қайд этиш керак, бир тур муқаддам «Ал-Ҳарайтият» Санжар Шоаҳмедов ва Темурхўжа Абдухолиқов ўйнаётган «Ас-Сайлия» клубидан ҳам устун келганди. Айни вақтда Турсунов ва жамоадошлари турнир жадвалида 9-ўринга кўтарилиб олган. «Ал-Жаиш» эса мағлубиятидан кейин кучли учликни якунлаб турган «Ар-Райян»дан 5 очко ортда қолишни бошлади.

20 очко билан 11-ўринга тушиб кетган «Ас-Сайлия» бугун — 17 февраль куни «Ал-Аҳли» майдонида саф тортади.

Қатар Юлдузлар лигаси 21-тур 16 февраль, пайшанба

«Ал-Ҳарайтият» — «Ал-Жаиш» 2:1

Голлар: Ромариньо, 7 (0:1). Абдулазиз Ан-Ансори, 63 (1:1). Тиберканине, 64 (2:1).