2017 йил 15 февраль куни айрим хорижий ОАВлар «Ҳукумат уй бузиш учун ёзни кутмади» деган нотўғри хабарни тарқатди. Ушбу хабарда кўтарилган масала юзасидан аниқлик киритиш мақсадида Бухоро вилояти ҳокимлиги ахборот ҳизмати хақиқий вазият билан боғлиқ қуйидаги ахборотни маълум этишга қарор қилди.
2017 йил январь ойи давомида Ўзбекистон Республикаси ҳукумати ҳудудларнинг ижтимоий-иқтисодий ривожлантиришга, туманлар ва шаҳарларни ободонлаштириш билан боғлиқ чора-тадбирларни амалга оширишга қаратилган бир қатор қарорларни қабул қилди.
Шу жумладан, Ўзбекистон Республикаси Вазирлар Маҳкамаси Бухоро вилоятининг аҳолиси саломатлиги ҳамда турмуш даражасини янада яхшилаш мақсадида 2017 йил 20 январь куни тегишли қарор қабул қилди.
Мазкур қарорни бажариш доирасида Олот тумани ҳокимлиги томонидан туман ҳудудини ободонлаштириш ишлари олиб борилмоқда. Шу аснода ҳокимлик томонидан ҳудуддаги кўп квартирали уй-жойлар атрофларида фуқаролар томонидан ноқонуний қурилишларни бартараф этиш, уй-жойларни шаҳарсозлик ва ёнғин хавфсизлиги меъёрларига мослаштириш мақсадида ишчи гуруҳлари тузилиб, иш фаолиятини бошлаш бўйича кўрсатмалар берилди.
Ишчи гуруҳлари тумандаги «Бунёдкор», «Нонимас» маҳалла фуқаролар йиғинларида кўп квартирали уйлар атрофларида қурилган кадастрда расмийлаштирилмаган молхоналар, ҳожатхоналар, омборчалар ҳамда бошқа қўшимча қурилган биноларни бузиш ишларини олиб борди.
Ноқонуний қурилишларни бузишдан олдин фуқароларга уларнинг қўшимча қурилишлари шаҳарсозлик меъёр ва қоидаларига мос келмаганлиги учун бузилиши юзасидан огоҳлантириш хатлари берилди.
Шуни алоҳида таъкидлаш жоизки, ишчи гуруҳларининг фаолияти давомида фуқаролар яшаш уйларининг бирортаси бузилмаган. Фақат кўп квартирали уйларга туташ қилиб ноқонуний қурилган қўшимча бинолар бартараф қилинди.
Ҳозирги вақтда об-ҳавонинг ноқулай келиши муносабати билан ноқонуний қурилмаларни бартараф этиш ишлари вақтинча тўхтатилган. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)