Тристан-да-Кунья ороли дунёдаги доимий одам яшайдиган ороллар орасида энг узоғи ҳисобланади. Бу ерда аэропорт йўқ, энг яқин давлат эса – ЖАР бўлиб, у 2816 км узоқликда жойлашган.
Бу ерга биринчи марта 1810 йилда Массачусетс штатидаги Салем шаҳридан доимий яшовчилар кўчиб келган. Жонатан Ламберт бошчилигидаги тўрт кишидан иборат кўчманчилар бу жойга Оромбахш орол деб ном берган.
Улардан уч нафари 1812 йилга келиб вафот этган. Тирик қолган Томас Каррининг бир ўзи оролда яшаб қолади ва фермер хўжалик билан шуғуллана бошлайди.
Ҳозирда орол Буюк Британияга қарашли денгиз орти Авлиё Елена Оролларининг бир қисми ҳисобланади.
Бу ерга бир йилда бир неча марта ЖАР давлатига қарашли балиқ овловчи кемалар киради. Кемага йўловчилар учун ҳам ўриндиқлар ўрнатилган.
2016 йил ҳолатига оролда етти авлодга мансуб 268 нафар аҳоли қайд қилинган. Бу ерда иш ўринлари кам бўлгани учун яшовчиларга давлат лавозимлари: полиция, божхона, экологик, табиатни қўриқлаш ва қишлоқ хўжалик хизматлари учун иш ўринлари яратилган.
Изоҳ (0)