Ўзбекистон норматив-ҳуқуқий ҳужжатлар муҳокамаси порталида Вазирлар Маҳкамасининг «Соя экинини етиштириш ва аҳолини соя ўсимлик мойига бўлган эҳтиёжини тўлақонли қондириш чора-тадбирлари тўғрисида»ги қарори лойиҳаси жойлаштирилди. Бу ҳақда Norma хабар бермоқда.
Ҳужжатда 2017—2021 йилларда соя ўсимлиги экиладиган майдонлар босқичма-босқич кўпайтириб борилиши, мазкур вақт давомида жами 92 266 гектар майдонга асосий, 40 557 гектар майдонга эса такрорий экин сифатида экилиши кўзда тутилган.
Қишлоқ ва сув хўжалиги вазирлиги, Адлия вазирлиги, «Ергеодезкадастр» давлат қўмитаси, Ўзбекистон фермерлари Кенгаши, «Ўзпахтаёғ» акциядорлик жамиятига Қорақалпоғистон Республикаси Вазирлар Кенгаши, ҳокимликлар билан биргаликда 1 ой муддатда соя экиладиган майдонларни фермер хўжаликлари ва контурлар кесимида аниқлаш, соя уруғлигини етиштиришга ихтисослашган уруғчилик фермер хўжаликларини белгиланган тартибда танлаб олиш, соя етиштирувчи фермер хўжаликлари ва ёғ-мой корхоналари ўртасида контрактация шартномаларини тузиш ва рўйхатдан ўтказиш вазифалари юклатилади.
«Ўзпахтаёғ» АЖ 2 ой муддатда Қорақалпоғистон Вазирлар Кенгаши ва вилоятлар ҳокимликлари буюртманомалари асосида соя етиштиришда илғор тажрибага эга бўлган хорижий давлатлардан 2017 йил ҳосили учун талаб қилинган 660 тонна соя уруғи келтирилишини таъминлаши билдирилган.
Соя етиштирадиган фермер хўжаликларини бўнак маблағлари билан таъминлаш мақсадида ёғ-мой корхоналарига тижорат банклари томонидан 36,5 миллиард сўм имтиёзли кредит ажратиш, кредит маблағларини 2017 йил мартига қадар фермер хўжаликларининг махсус ҳисоб рақамларига йўналтириш кўзда тутилмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)