Республика ҳаж ва умра тадбирларини ташкил этиш ҳамда ўтказиш масалалари бўйича Жамоатчилик кенгаши тавсияси билан ташкил этилган «Умра—2017» баҳор мавсуми давомида 5350 нафар фуқаронинг зиёратга бориши режалаштирилган. Бу ҳақда Вазирлар Маҳкамаси ҳузуридаги Дин ишлари бўйича қўмита маълум қилди.
Мавсум давомида зиёратчиларга Саудия Арабистонида 8 нафар ишчи гуруҳ, 8 нафар ошпаз ва 27 нафар шифокор хизмат кўрсатади.
Ўн кунлик умра сафари давомида ўзбекистонлик зиёратчилар Мадина шаҳрида 3 кун бўлиб, «Нур Мавадда» меҳмонхонасида истиқомат қилиши режалаштирилган. Макка шаҳрида эса Ҳарам масжидидан 500-600 метр масофада жойлашган «Аброж Кисва» меҳмонхонаси зиёратчиларни кутиб олишга шай ҳолатга келтирилган бўлиб, умрачилар у ерда 7 кун давомида бўлади.
Умра зиёратига тайёргарлик доирасида барча зиёратчилар мавсумий касалликларга қарши эмланиб, давлат рамзи туширилган камзул ва сумкалар билан таъминланади. Сафар олдидан уларга умра сафарининг моҳияти, уни адо этишга доир масалалар гуруҳ раҳбарлари томонидан тушунтирилади.
Зиёратчиларни «Тошкент» халқаро аэропортидан Дин ишлари бўйича қўмита ҳамда Ўзбекистон мусулмонлари идораси масъуллари мутасадди ташкилотлар билан ҳамкорликда кузатилади.
Ўзбекистон мусулмонлари идораси ва «Ўзбекистон ҳаво йўллари» МАК ўртасидаги келишувга кўра, «Умра—2017» баҳор мавсуми зиёратчиларини кузатиш 20 февралдан 1 апрелга қадар давом этади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)