Кремль Эронни «террорчи давлат» деб ҳисобламайди ва ушбу мамлакат билан муносабатларни ривожлантиришни мўлжалламоқда. Бу ҳақда Россия президенти матбуот котиби Дмитрий Песков сўзларига таяниб, «ТАСС» хабар бермоқда.
Дмитрий Песков АҚШ президенти Дональд Трампнинг Эронни «биринчи рақамли террорчи давлат» деб атагани ҳақида тўхталиб, «Биз саволнинг бундай қўйилишига қаршимиз», — деб қайд этди.
«Сизга маълумки, Россия Эрон билан илиқ шерикчилик муносабатлари ўрнатган. Биз қатор масалаларда биргаликда фаолият юритамиз. Савдо-иқтисодий соҳадаги алоқаларимизни қадрлаймиз ва уларни янада ривожлантиришга умид қиламиз», — деди Кремлнинг расмий вакили.
Песков Эронга нисбатан турлича бўлган қарашнинг АҚШ ва Россия ўртасидаги алоқалар яхшиланишига таъсир қилиши эҳтимоли ҳақидаги саволга ҳам жавоб берди:
«Ҳеч кимга сир эмас, қатор халқаро ва минтақавий масалалар бўйича Москва ва Вашингтоннинг нуқтаи назари бир-бирига мутлақо зид. Шу билан бир вақтда ушбу ҳолат Россия ва АҚШ ўртасида алоқалар ва ўзаро фойдали прагматик муносабатлар ўрнатишга тўсқинлик қилмайди ва қилмаслиги ҳам керак».
Эслатиб ўтамиз, аввалроқ Дональд Трамп Эронни «биринчи рақамли террорчи давлат» деб атаб, Теҳронни АҚШни мутлақо ҳурмат қилмасликда айблаган эди.
Изоҳ (0)