Бутунжаҳон бокс серияси (WSB)нинг 1-турини Ўзбекистон терма жамоаси сафарда ўтказиб, Хитойнинг China Dragons клубига 2:3 ҳисобида имкониятни бой берганди.
Унда Мироншоҳ Ибрагимов (-49) ва Абдулҳай Шораҳмедов (-56) хитойлик спортчиларни мағлуб этган этган бўлса, Улуғбек Ҳақбердиев (-75) ҳамда Бобур Йўлдошев (-91) имкониятни бой бериб қўйганди. Uzbek Tigers сафида Элнур Абдураимов (-64) ҳам рингга чиқиб, терма учун 1 очко ишлаб олиши мумкин эди. Бироқ у рингга чиқмасликни афзал билди.
Ўзбекистон бокс федерацияси матбуот хизматининг «Дарё»га маълум қилишича, Элнур Абдураимов жангдан бир кун олдин бўлиб ўтган машғулотда жароҳат олган. Бу эса унга эртаси куни рингга чиқиш имкониятини бермаган.
Маълумот учун, терма жамоани Тўлқин Қиличев ва Раҳматжон Рўзиоҳунов мураббий сифатида Хитойга олиб борганди. Жамоанинг тиббий масалаларига эса Комил Расулов жавобгар бўлган.
Бутунжаҳон бокс серияси (WSB)нинг 2-турини ҳам Ўзбекистон терма жамоаси сафарда ўтказади. Uzbek Tigers жамоасининг навбатдаги рақиби Қозоғистоннинг Astana Arlans клуби бўлади.
Тўқнашувлар 18 февраль куни Қозоғистоннинг Толдиқўрғон шаҳрида ўтади. Унда ҳам одатга кўра Қозоғистон ва Ўзбекистоннинг беш нафардан боксчиси ўзаро рингга кўтарилади. Astana Arlans 1-турни Москва шаҳрида Россиянинг Patriot Boxing Team жамоасига қарши ўтказиб, 3:2 ҳисобида устун келганди.
Изоҳ (0)