Lego ўз ижтимоий тармоғини ишга туширди

Lego компанияси Lego Life ижтимоий тармоғини яратди, деб ёзади «Hi-tech.mail.ru». У хавфсиз бўлиб, 13 ёшгача болалар учун мўлжалланган.

Ҳар қандай ижтимоий тармоқда қўполликка дуч келиш ёки «катталар учун» контентни кўриб қолиш ҳеч гап эмас. Lego Life’да  ҳаммаси бошқача — кимнидир ҳақорат қилиш жуда қийин, чунки мулоқот эмодзи ва стикерлар ёрдамида амалга оширилади.

Ижтимоий тармоқ Lego томонидан UNICEF билан ҳамкорликда яратилди. Унинг мақсади — болаларни мулоқот учун майдон билан таъминлаш, Lego’дан ясалган «асарлари» фото ва видеолари билан бўлишиш, маслакдошларни топиш имконини бериш. Муҳокамалар ҳам қилиш мумкин, аммо фақат эмодзи ва стикерлар ёрдамида, шу туфайли салбий фикрларга бола дуч келмайди.

Тармоққа кириш учун дастурни юклаб олиш керак, iOS ва Android учун версиялар бор. Рўйхатдан ўтишда бола ота-онасининг e-mail’ини кўрсатади, улар эса аккаунт яратилишини тасдиқлайди. Ҳозирча Lego Life фақат АҚШ, Буюк Британия, Германия ва Францияда ишга туширилди.