Канадалик талаба масжиддаги олти кишини ўлдирди. Асосий маълумотлар
29 январь оқшомида Канаданинг Квебек шаҳридаги масжидда олти зиёратчи отиб ташланди. Қотил канадалик Александр Биссоннетт бўлиб чиқди – у ўз қилмишидан кўп ўтмай, полицияга таслим бўлди. Ёш йигитча ўзининг ўнг қарашлари билан танилган, мунтазам равишда муҳожирлар ва мусулмонларни танқид қилиб келган. Meduza нашри Квебекдаги масжидга уюштирилган ҳужум ҳақидаги асосий маълумотларни бир саҳифага жамлади.
Александр Биссоннетт масжидга хуфтон намозида, маҳаллий вақт билан тахминан 19:50 (Тошкент вақти билан 05:50 да) кириб келган. Гувоҳларнинг сўзларига кўра, у йиғилганларга қарата дарҳол ўт очган – қуролининг магазинидаги патронлар тугамагунича ўқ узишни тўхтатмаган. Ўқотар қуролдан олган жароҳати сабаб олти киши ҳодиса жойида ҳалок бўлган; уларнинг бари масжид зиёратчилари бўлиб, Канадага Африка мамлакатларидан келган муҳожирлар эди. Яна беш киши яраланган, улардан икки нафарининг аҳволи оғир экани айтилмоқда.
Отишмани тугатиб, Биссоннетт масжиддан чиққан ва автомобилига ўтириб, ҳодиса жойидан жўнаб кетган. 17 дақиқадан сўнг машинасини тўхтатиб, 911 хизматига қўнғироқ қилган. Биссоннетт масжидга ўзи ҳужум қилганини айтиб, энди ўз жонига қасд қилмоқчи эканини таъкидлаган. Унинг машинаси орқа ўриндиғидан, тасдиқланмаган маълумотларга кўра, тўппонча ва АК-47 га ўхшаш иккита ўқотар қурол топилган.
Ҳужум қилган шахс – ўзининг ўта ўнг қарашлари билан танилган 27 ёшли талабадир. У билан интернетда мулоқотда бўлган одамларнинг сўзларига кўра, Биссоннетнинг муҳожирлар ва мусулмонларга қарши фикрлари Квебекка Франциянинг «Миллий фронт» партияси раҳбари Марин Ле Пен келиб кетганидан сўнг айниқса кучайган. У, шунингдек, АҚШ президенти Дональд Трампнинг ҳам ёрқин тарафдори бўлган.
Биссоннет Лавал университетида антропология ва сиёсатшуносликни ўрганган. Ўқишдан бўш вақтида эса донорлик қони тўплаш билан шуғулланувчи Hema-Quebec колл-марказида ишлаган. Ота-онасининг қўшнилари берган гувоҳликка кўра, Биссоннетт одатдагидек оилада вояга етган ва авваллари ҳеч қандай ажабтовур хулқи билан ажралиб турмаган, бироқ одамовироқ бўлган.
Канада ҳукумати юз берган воқеани мусулмонларга қарши қаратилган теракт деб эълон қилди. Қотиллик ва қотилликка суиқасд қилиш ҳолатлари бўйича Биссоннеттга нисбатан айблов эълон қилинган. У уюштирган ҳужум барча диний конфессияларнинг вакиллари томонидан қораланди.
Масжидга уюштирилган ҳужумга қадар Квебекда 21 ой давомида қотиллик юз бермаган эди. Шаҳар ва шу номли вилоят аҳолиси муҳожирларга нисбатан консерватив қарашлари билан танилган. 2016 йилнинг июлида, муқаддас Рамазон ойининг айни авж палласида, Биссоннетт ҳужум қилган масжид эшиклари остида «Ёқимли иштаҳа!» деган ёзув билан чўчқанинг боши қолдирилиб кетилган эди. Масжид вакиллари бу ҳодисани шунчаки тасодиф санаб, шаҳардаги умумий кайфиятга ҳеч бир алоқаси йўқ, деб ҳисоблаган эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
