Legioner.uz. Мухлислар танқидига учраган Фомин Уммон клубига ўтди, Сардор Рашидов жамоаси йирик мағлубиятга учради

Максимилиан Фомин

Сўнгги мавсумни «Бухоро» футбол клубида ўтказган ўзбекистонлик ҳимоячи фаолиятини Уммоннинг «Саҳам» клубида давом эттиради, деб хабар берди «Championat.asia» нашри. Футболчининг уммонликлар билан шартномаси қанчага мўлжаллангани айтилмаган.

«Саҳам» 2013 йилги мавсум Уммон чемпионлигини қўлга киритган бўлиб, 2017 йил ОФК кубогининг гуруҳ босқичида иштирок этади. Бу Осиё чемпионлар лигасидан кейин қитъа клубларининг иккинчи рақамли нуфузли мусобақаси ҳисобланади.

Фомин «Саҳам» сафида битта ўртоқлик ўйинида майдонга тушиб улгурди. «Локомотив»нинг Осиё чемпионлар лигасидаги рақиби «Ат-Тавон» клубига қарши кечган учрашув Максимилиан учун Уммон клубидаги биринчиси бўлди.

Фомин Ўзбекистон олимпия терма жамоасидаги ўйинлари орқали футбол мухлисларига яхши таниш. Самвел Бабаян бошчилик қилган жамоа Рио—2016 йўлланмасини қўлга кирита олмагач, Фомин мухлислар танқидига чидай олмай, Facebook саҳифаси орқали уларни «илиқ» сўзлар билан сийлаган, кейинроқ эса бундан афсусланиб, расман узр сўраганди.

Сардор Рашидов

Ўзбекистонлик футболчи ҳаракат қилаётган Қатарнинг «Ал-Жаиш» клуби Юлдузлар лигасининг 17-турида йирик мағлубият қабул қилиб олди. Ўз майдонида «Ар-Райян» клубини қабул қилган «Ал-Жаиш» 1:4 ҳисобида енгилди ва рақибига 3-поғонасини бўшатиб беришга мажбур бўлди.

Сардор Рашидов беллашувда тўлиқ иштирок этди, бироқ жамоасини мағлубиятдан қутқариб қола олмади. Мазкур турда Санжар Турсунов ҳаракат қиладиган «Ал-Ҳарайтият» клуби ҳам енгилган бўлса, Темурхўжа Абдухолиқовнинг голи «Ас-Сайлия»га 3 очко тақдим этганди.

Қатар Юлдузлар лигаси 17-тур 22 январь, якшанба

«Ал-Жаиш» — «Ар-Райян» 1:4

Голлар: Себастьян Сория, 13-пен (0:1). Лукас Мендес, 30 (1:1). Серхио Гарсия, 33 (1:2). Родриго Табата, 75 (1:3). Натан Отавио, 82 (1:4).

Малайзиядагилар

Бир эмас икки нафар ўзбекистонлик футболчиларни ўз сафига қўшиб олган «Т-Тим» ўртоқлик ўйинларида бир қатор рақибларни мағлуб этиб келаётганди. Расмий ўйинда клуб ўз уйида очко йўқотди.

Малайзия чемпионатининг 1-турида Фарҳод Тожиев ҳам ўртоқлик ўйинларида ураётган голларини ура олмади. Унинг қаторида Дилшод Шарофутдинов ҳам бошланғич таркибда кўриниш берди. Бироқ бу ҳолат «Т-Тим»нинг ғалабаси учун камлик қилди.

Малайзия Супер лигаси 1-тур 22 январь, якшанба

«Т-Тим» — «Саравак» 1:1

Голлар: Моҳд Нурҳаким, 50 (1:0). Роскам, 80 (1:1).