Лос-Анжелес шаҳри яқинидаги Бель-Эйр комплексида АҚШдаги энг қиммат уй савдога қўйилди. Ҳашаматли уй 250 миллион долларга баҳоланмоқда. Сотувчи уйга қиймати 30 миллион долларни ташкил қиладиган автомобиллар коллекциясини ҳам қўшиб беради. Бу ҳақда «Мотор» хабар берди.
Уй сотувчиси, BAM Luxury Development Group, уйга қўшиб бериладиган автомобилларнинг аниқ рўйхатини бермаган. Шундай бўлса ҳам, эълон қилинган видео ва расмлардан кўриниб турибдики, янги уй эгаси Bugatti Veyron, Rolls-Royce Dawn, Pagani Huayra, Ariel Atom, Morgan 3-Wheeler Brooklands Edition ва Ferrari 488 GTB каби автомобилларни қўлга киритади.
Шу билан бирга, уй гаражида Mercedes-Benz 540K ва Allard J2X каби камёб машиналар ҳам бор. Шунингдек, уйнинг янги эгаси мотоцикллар, қайиқ моторлари тўплами, «Ҳаво бўриси» телесериалидаги вертолётнинг эгасига айланади.
Уйнинг майдони 3530 квадрат метрни ташкил қилади. Уйни барпо қилиш учун тўрт йил талаб қилинган. Қурилишда 300 та ишчи ишлаган.
Уйда 12 та ётоқхона, 21 та ювиниш хонаси, учта ошхона, ҳовуз, томоша майдончаси, шунингдек, 40 кишига мўлжалланган кинотеатр ва махсус ширинлик девори жойлашган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)