Ўзбекистон Президенти Шавкат Мирзиёев мамлакатни 2016 йилда ижтимоий-иқтисодий ривожлантиришнинг асосий якунлари ва 2017 йилга мўлжалланган иқтисодий дастурнинг энг муҳим устувор йўналишларига бағишланган Вазирлар Маҳкамасининг кенгайтирилган мажлисида ҳукумат фаолиятини танқид остига олди, деб ёзади «Газета.uz».
Бош вазир ўринбосари, Экспорт салоҳияти ва машинасозликни, автомобиль ва электротехника саноатини ривожлантириш, маҳсулотларни стандартлаштириш масалалари бўйича комплекс раҳбари, «Ўзавтосаноат» компанияси бошқаруви раиси Улуғбек Рўзиқулов ҳайфсан олди.
Ҳайфсан, шунингдек, бош вазир ўринбосари, Геология, ёқилғи-энергетика комплекси, кимё, нефть-кимё ва металлургия саноати масалалари бўйича комплекс раҳбари Ғуломжон Ибрагимовга ҳам эълон қилинди.
Ишдаги камчиликлар туфайли, 1 триллион сўм ҳажмида қарздорлиги бўлган «Ўзнефтмаҳсулот» компанияси раҳбари Бахтиёр Султонов истеъфога чиқарилди. Бундан ташқари, давлат раҳбари сўзларига кўра, фаолияти «давр талабларига мутлақо жавоб бермайдиган» «Ўзэлтехсаноат» компанияси раҳбари Эркин Иминов ҳам ўз лавозимидан ажралди.
Президент, шунингдек, «Ўзкимёсаноат» раиси Нормат Ибрагимовни лавозимидан озод этишни таклиф қилди. Бошқа бир қатор мансабдорларнинг ҳам фаолияти жиддий танқид остига олинди.
«Ҳаммамизга бир ҳақиқат равшан бўлиши лозим: биз мавжуд ривожланиш суръатлари билан ўз олдимизга қўйган юксак мақсадларга эриша олмаймиз. Бугун замон ўзгармоқда, унинг талаби, олдимизга қўяётган вазифалари тобора ортиб бормоқда. Мана шундай мураккаб шароитда «Сен – менга тегма, мен – сенга тегмайман» деган кайфият билан ишлашнинг вақти ўтди. Биз «вазият ёмон, вазият оғир» деб баҳона қидиришга ўрганиб қолганмиз. Лекин шу вазиятни ким ўзгартиради, ким изга солади, деган саволни, келинг, ўзимизга берайлик. Вазиятни ўзимиз, ўз ақл-заковатимиз, меҳнатимиз билан ўзгартирмасак, ҳеч ким четдан келиб бу ишни биз учун қилиб бермайди», — деди давлат раҳбари.
Изоҳ (0)