Ўзбекистон Республикаси Ички ишлар вазирлиги Ёнғин хавфсизлиги бош бошқармаси 2016 йилнинг 10 ноябридан 2017 йилнинг 10 январига қадар ўтказилган Ёнғин хавфсизлиги кунлари якунларини сарҳисоб қилди. Бу ҳақда ЎзА хабар бермоқда.
— Профилактика ва тушунтириш ишлари ёнғин хавфсизлигини таъминлаш борасида муҳим омил ҳисобланади, — дейди Ўзбекистон Республикаси Ички ишлар вазирлиги Ёнғин хавфсизлиги бош бошқармаси бошлиғи ўринбосари А.Султонов. — Икки ойлик мобайнида ёнғинлар миқдори 20 фоизга ва бунинг натижасида жабрланганлар ҳамда қурбон бўлганлар сони сезиларли равишда камайди.
Саноат, ижтимоий ва турар жой объектларининг ёнғинга қарши ҳолатини текшириш бу борадаги ишларнинг муҳим йўналиши бўлди. Жумладан, 55 мингдан зиёд саноат ва ижтимоий объектларда ёнғин хавфсизлиги қоидаларига риоя этиш ҳолати ўрганилиб, бир миллиондан ортиқ уй-жой текширилди ва уларда яшовчи аҳоли билан ёнғин хавфсизлиги мавзусида суҳбатлар ўтказилди. Аниқланган камчиликлар ўз вақтида бартараф этилди.
Сўнгги икки ойда 3 мингдан зиёд бино ва иншоотдан фойдаланиш вақтинчалик тўхтатилди, ёнғин чиқариш хавфи бўлган 33 мингта турли ускуна, агрегат ва мосламалардан фойдаланиш тақиқланди.
Ёнғин хавфсизлиги кунлари давомида барча вилоятларда 124 янги ўт ўчириш мосламаси ўрнатилиб, 345 мослама таъмирланди, 38 ҳовуз барпо этилди ва 200 таси таъмирдан чиқарилди. Саноат ва ижтимоий объектларда ёнғинга қарши 323 тактик-ўқув машқлари ва 4,3 минг машғулот ўтказилди.
Автомобилларга ёқилғи қуйиш шохобчаларида, шахсий ва шаҳар автотранспорт воситаларидан фойдаланишда ёнғин хавфсизлигини таъминлашга ҳам алоҳида эътибор қаратилмоқда. Ёнғин назорати ходимлари барча автобус паркларига бориб, уларнинг ходимларига бу борада зарур кўрсатмалар бермоқда, ёнғин хавфсизлиги қоидаларига риоя этилишини текширмоқда.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)