BuzzFeed нашри АҚШнинг сайлаган президенти Дональд Трампнинг сўзлари туширилган футболкалар, стикерлар ва бошқа товарларни сотиш учун интернет дўкон очди. Дональд Трамп ўз матбуот конференциясида ушбу портални «бир бўлак ахлат» деб атаган эди. Ушбу товарларнинг бир кунлик савдоси натижасида BuzzFeed 25 минг доллардан кўпроқ фойда олди, деб хабар берди TJournal.
Нашриёт бу фойдани матбуот эркинлигини қўллаб-қувватлаш бўйича фаолият кўрсатувчи нотижорат ташкилот Committee to Protect Journalists’га йўналтиришга ваъда берди.
Эслатиб ўтамиз, 11 январь куни BuzzFeed Россия махсус хизматларида Дональд Трампни обрўсизлантирувчи маълумотлар борлигидан далолат берувчи ҳужжатларни чоп этганди. Аммо нашр мазкур ҳужжатлардаги маълумотларни ҳақиқат эканлигини тасдиқлай олмаганди. Ўша куни Дональд Трамп сайловлардаги ғалабасидан кейинги илк матбуот анжуманини ўтказди. Анжуманда Трамп BuzzFeed ёлғон маълумотлар чоп этишини айтиб, нашр журналистининг савол беришига йўл қўймаганди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)