Ўзбекистон миллий терма жамоаси бош мураббийи Самвел Бабаян ва жамоа сардори Одил Аҳмедов ФИФАнинг йил футболчиси ва мураббийини аниқлашдаги сўровномасида кимга овоз бергани маълум бўлди. ЎФФ матбуот хизмати уларнинг қайси учликни кўрсатганига ойдинлик киритди.
Маълум бўлишича, на Самвел Бабаян ва на Одил Аҳмедов якунда The Best совринига лойиқ кўрилган Криштиану Роналдуни 1-ўринга жойлаштирган. Уларнинг ҳар иккиси ҳам 1-ўринга Аргентина терма жамоаси ва «Барселона» ҳужумчиси Лионель Мессини раво кўрган. Қизиқ томони, Самвел Бабаян кучли учликка Криштиануни умуман киритмаган ва Мессидан кейин Тони Кроос ҳамда Антуан Гризманн номларини кўрсатган.
Одил Аҳмедов эса 2-ўринни Роналдуга тақдим этди. Учинчи футболчи деб Антуан Гризманни кўрсатди. Айнан шу уч футболчи якуний номзодлар сифатида ФИФА томонидан кўрсатилганди.
Энг яхши мураббий сифатида Самвел Бабаян Клаудио Ранери номзодини кўрсатди. Кейинги ўринларга Диего Симеоне ва Зинедин Зиданни жойлаштирди. Одил Аҳмедовда эса учлик Юрген Клопп, Луис Энрике ва Хосеп Гвардиола кўринишини олди. Якунда Самвел Бабаян хизматларини эътироф этган Клаудио Ранери йилнинг энг яхши мураббийи сифатида кўрсатилди.
2016 йил якунларига кўра ФИФА америкалик Карли Ллойдни энг яхши аёл футболчи деб, Германия олимпия терма жамоасини Рио—2016 чемпионлиги сари етаклаган Силвия Найдни эса энг яхши аёллар мураббийи деб тан олганди. Табиийки, йилнинг энг яхши аёл футболчиси ва мураббийини аниқлашда Ўзбекистон аёллар терма жамоаси бош мураббийи ва сардори ҳам иштирок этди.
Ўзбекистон аёллар терма жамоаси бош мураббийи Шерали Бобоқулов Карли Ллойдни иккинчи ўринга лойиқ кўрган бўлиб, 1-ўринни Женифер Марозсанга берган. Энг яхши мураббий деб эса Силвия Найдни кўрсатган.
Аёллар терма жамоаси сардори Маҳлиё Сарикова эса ҳар икки вариантида ҳам якунда ғолибликни қўлга киритган футболчи ва мураббийга 1-ўринни тақдим этган. Устози Шерали Бобоқулов энг яхши деб атаган футболчи қизни эса умуман 3-ўринга жойлаштирган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.