O‘zbekiston milliy terma jamoasi bosh murabbiyi Samvel Babayan va jamoa sardori Odil Ahmedov FIFAning yil futbolchisi va murabbiyini aniqlashdagi so‘rovnomasida kimga ovoz bergani ma’lum bo‘ldi. O‘FF matbuot xizmati ularning qaysi uchlikni ko‘rsatganiga oydinlik kiritdi.
Ma’lum bo‘lishicha, na Samvel Babayan va na Odil Ahmedov yakunda The Best sovriniga loyiq ko‘rilgan Krishtianu Ronalduni 1-o‘ringa joylashtirgan. Ularning har ikkisi ham 1-o‘ringa Argentina terma jamoasi va “Barselona” hujumchisi Lionel Messini ravo ko‘rgan. Qiziq tomoni, Samvel Babayan kuchli uchlikka Krishtianuni umuman kiritmagan va Messidan keyin Toni Kroos hamda Antuan Grizmann nomlarini ko‘rsatgan.
Odil Ahmedov esa 2-o‘rinni Ronalduga taqdim etdi. Uchinchi futbolchi deb Antuan Grizmanni ko‘rsatdi. Aynan shu uch futbolchi yakuniy nomzodlar sifatida FIFA tomonidan ko‘rsatilgandi.
Eng yaxshi murabbiy sifatida Samvel Babayan Klaudio Ranyeri nomzodini ko‘rsatdi. Keyingi o‘rinlarga Diyego Simeone va Zinedin Zidanni joylashtirdi. Odil Ahmedovda esa uchlik Yurgen Klopp, Luis Enrike va Xosep Gvardiola ko‘rinishini oldi. Yakunda Samvel Babayan xizmatlarini e’tirof etgan Klaudio Ranyeri yilning eng yaxshi murabbiyi sifatida ko‘rsatildi.
2016-yil yakunlariga ko‘ra FIFA amerikalik Karli Lloydni eng yaxshi ayol futbolchi deb, Germaniya olimpiya terma jamoasini Rio—2016 chempionligi sari yetaklagan Silviya Naydni esa eng yaxshi ayollar murabbiyi deb tan olgandi. Tabiiyki, yilning eng yaxshi ayol futbolchisi va murabbiyini aniqlashda O‘zbekiston ayollar terma jamoasi bosh murabbiyi va sardori ham ishtirok etdi.
O‘zbekiston ayollar terma jamoasi bosh murabbiyi Sherali Boboqulov Karli Lloydni ikkinchi o‘ringa loyiq ko‘rgan bo‘lib, 1-o‘rinni Jenifer Marozsanga bergan. Eng yaxshi murabbiy deb esa Silviya Naydni ko‘rsatgan.
Ayollar terma jamoasi sardori Mahliyo Sarikova esa har ikki variantida ham yakunda g‘oliblikni qo‘lga kiritgan futbolchi va murabbiyga 1-o‘rinni taqdim etgan. Ustozi Sherali Boboqulov eng yaxshi deb atagan futbolchi qizni esa umuman 3-o‘ringa joylashtirgan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)