Албания элчихонасининг муваққат вакили Жалол Файза Сербия ташқи ишлар вазирлигига чақиртирилди ва унга Франциянинг Тиранадаги элчихонаси биноси олдида серб миллий байроғи таҳқирлангани муносабати билан норозилик билдирилди. Бу ҳақда «ТАСС» хабар бермоқда.
«Албания расмийларига ҳуқуқбузарни қидириб топиш ва уни маҳаллий қонунларга биноан жазолаш ҳамда бу ҳақда серб томонини хабардор қилиш ҳақидаги талабнома юборилди», — дейилади Сербия ТИВ баёнотида.
Ўз навбатида, муваққат вакил юз берган ҳодиса юзасидан афсус билдирди ва Белграднинг бунга муносабати Албания ТИВга зудлик билан етказилишини маълум қилди.
Эслатиб ўтамиз, 4 январь, чоршанба куни Франция полицияси Косово собиқ бош вазири Рамуш Харадинайни Сербия ордери бўйича ҳибсга олди. Шундан сўнг Косово ва Албанияда норозилик намойишлари, аксилсерб акциялари бўлиб ўтди ҳамда улардан бирида юқоридаги ҳодиса юз берди.
Изоҳ (0)