Марказий Африка Республикасида қуролли шахслар ҳужуми натижасида бир ҳафтада учинчи БМТ тинчликпарвари ўлдирилди, деб ёзади «ТАСС» жаҳон ташкилоти бош котибининг расмий вакили Стефан Дюжаррикка таяниб.
«БМТ тинчликпарварлари Уам-Пенде префектурасидаги Кои шаҳрида патрулликдан қайтаётган вақтда уларга 50 га яқин қуролли кишилар ҳамла қилди. Бангладешлик тинчликпарвар ҳалок бўлди», — деди Дюжаррик. Унинг сўзларига кўра, БМТнинг МАРдаги миссияси ушбу ҳужумни, шунингдек, тинчликпарварларга нисбатан бошқа тажовузкор ҳаракатлар ва гиж-гижлашларни қоралайди ҳамда Бангладеш ҳукуматига ҳамдардлик изҳор этади.
Нашр эслатишича, 4 январь куни Обо шаҳрига ёқилғи етказиб бераётган БМТ автоколоннасига жангарилар гуруҳи ҳужум қилиши оқибатида икки нафар марокашлик тинчликпарвар ҳалок бўлган, яна икки киши яраланган эди.
Изоҳ (0)