АҚШнинг Форт-Лодердейл шаҳри (Флорида штати) аэропортида уюштирилган отишма оқибатида 5 киши ҳалок бўлди, 8 киши жароҳатланди. Бу ҳақда «ТАСС» хабар бермоқда.
«Аэропортда ҳақиқий саросима ҳукм сурмоқда. Нима бўлаётганини тушунмадик, полиция нима деб қичқираётганини эшитмадик. Отишма аэропорт пастки қаватидаги юк бўлимида юз берди», — дея маълум қилди воқеа жойида бўлган CNN мухбири.
Ўқ узган эркак қўлга олинди, уни Федерал қидирув бюроси ходимлари сўроқ қилмоқда. Сенатор Билл Нелсон CNN телеканали эфирида ҳужум қилган шахснинг ёнидан Эстебан Сантьяго номига берилган ҳарбий гувоҳнома топилганини билдирди.
Associated Press агентлигига кўра, ўтган йил ноябрида эркак ФҚБ билан кўришган ва ўшанда «ақл-идрокини АҚШ ҳукумати назорат қилаётгани», расмийлар гўё уни «ИШИД видеолавҳаларини кўришга мажбурлаётгани»ни маълум қилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)