Одил Аҳмедов ўзининг трансферидан «Краснодар» кўпроқ фойда қилиши учун Европадан келган таклифларни рад этганини айтди

Футбол бўйича Ўзбекистон терма жамоаси сардори Одил Аҳмедов 30 декабрь куни Хитойнинг «Шанхай SIPG» жамоаси аъзосига айлангани ҳақида маълум қилинди. Футболчининг фикрича, унинг Хитой чемпионатида ўйнаши профессионал фаолиятига асло таъсир ўтказмайди, деб хабар беради «Sports.uz».

Менга нафақат Хитой чемпионатидан, балки Европанинг бир нечта чемпионатларидан ҳам таклифлар бўлганди. Аммо мен айнан ‘Краснодар’ учун фойдалироқ бўлган мана шу таклифни қабул қилишга қарор қилдим. Хитой чемпионатига ўтишим бу орқага ташланган қадам, деб билмайман. Чунки ҳозир бу чемпионатда дунёнинг энг кучли футболчилари тўп сурмоқда. Уларни эса энг кучли мураббийлар шуғиллантиради. Шартнома имзолашимдан аввал Виллаш-Боаш билан гаплашдим. У менга режалари ва мени жамоадаги вазифам нималардан иборат эканлигини айтди. Шундан сўнг мен бу таклифни қабул қилдим.

Одил Аҳмедов, Ўзбекистон миллий терма жамоаси сардори

Маълумот учун, Одил Аҳмедов 2014 йилнинг июнь ойида 4 миллион евро эвазига «Анжи»дан «Краснодар»га келиб қўшилганди. У жамоанинг 101 та расмий ўйинда майдонга тушиб, 7 та гол уришга муваффақ бўлди ва 13 та голли узатма берди. «Краснодар» эса ўзбекистонлик футболчини «Шанхай SIPG»га 7 миллион еврога сотди.

• Одил Аҳмедовни сотган клублар ҳеч қачон зарар кўрмаган. Футболчининг барча трансферлари — битта суратда

Қайд этиш жоиз, Хитойнинг «Шанхай SIPG» клубини ўз вақтида Санкт-Петербургнинг «Зенит» клубида ишлаган португалиялик Андре Виллаш-Боаш бошқариб боради. Мутахассис Россиядаги фаолияти орқали Одил Аҳмедовнинг имкониятларини билади, дейиш мумкин.

Хитой клуби 2016 йилги мавсум давомида Осиё клублари учун рекорд суммага икки футболчи харид қилишга улгурган эди. Аввалига «Зенит»дан Халк, кейинроқ эса «Челси»дан Оскар «Шанхай SIPG» билан шартнома имзолаган.

Одил Аҳмедовдан ташқари Хитой Супер Лигасида Ўзбекистон миллий терма жамоасининг яна икки нафар футболчиси тўп тепади. Анзур Исмоилов «Чанчунг Ятаи» футбол клуби шарафини ҳимоя қилса, Егор Кримец «Бейцзинг Гоан» сафида ҳаракат қилади.

• Фото: Хитой чемпионатида тўп сурган ўзбекистонлик барча футболчилар

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.