Odil Ahmedov o‘zining transferidan “Krasnodar” ko‘proq foyda qilishi uchun Yevropadan kelgan takliflarni rad etganini aytdi

Futbol bo‘yicha O‘zbekiston terma jamoasi sardori Odil Ahmedov 30-dekabr kuni Xitoyning “Shanxay SIPG” jamoasi a’zosiga aylangani haqida ma’lum qilindi. Futbolchining fikricha, uning Xitoy chempionatida o‘ynashi professional faoliyatiga aslo ta’sir o‘tkazmaydi, deb xabar beradi “Sports.uz”.

Menga nafaqat Xitoy chempionatidan, balki Yevropaning bir nechta chempionatlaridan ham takliflar bo‘lgandi. Ammo men aynan ‘Krasnodar’ uchun foydaliroq bo‘lgan mana shu taklifni qabul qilishga qaror qildim. Xitoy chempionatiga o‘tishim bu orqaga tashlangan qadam, deb bilmayman. Chunki hozir bu chempionatda dunyoning eng kuchli futbolchilari to‘p surmoqda. Ularni esa eng kuchli murabbiylar shug‘illantiradi. Shartnoma imzolashimdan avval Villash-Boash bilan gaplashdim. U menga rejalari va meni jamoadagi vazifam nimalardan iborat ekanligini aytdi. Shundan so‘ng men bu taklifni qabul qildim.

Odil Ahmedov, O‘zbekiston milliy terma jamoasi sardori

Ma’lumot uchun, Odil Ahmedov 2014-yilning iyun oyida 4 million yevro evaziga “Anji”dan “Krasnodar”ga kelib qo‘shilgandi. U jamoaning 101 ta rasmiy o‘yinda maydonga tushib, 7 ta gol urishga muvaffaq bo‘ldi va 13 ta golli uzatma berdi. “Krasnodar” esa o‘zbekistonlik futbolchini “Shanxay SIPG”ga 7 million yevroga sotdi.

• Odil Ahmedovni sotgan klublar hech qachon zarar ko‘rmagan. Futbolchining barcha transferlari — bitta suratda

Qayd etish joiz, Xitoyning “Shanxay SIPG” klubini o‘z vaqtida Sankt-Peterburgning “Zenit” klubida ishlagan portugaliyalik Andre Villash-Boash boshqarib boradi. Mutaxassis Rossiyadagi faoliyati orqali Odil Ahmedovning imkoniyatlarini biladi, deyish mumkin.

Xitoy klubi 2016-yilgi mavsum davomida Osiyo klublari uchun rekord summaga ikki futbolchi xarid qilishga ulgurgan edi. Avvaliga “Zenit”dan Xalk, keyinroq esa “Chelsi”dan Oskar “Shanxay SIPG” bilan shartnoma imzolagan.

Odil Ahmedovdan tashqari Xitoy Super Ligasida O‘zbekiston milliy terma jamoasining yana ikki nafar futbolchisi to‘p tepadi. Anzur Ismoilov “Chanchung Yatai” futbol klubi sharafini himoya qilsa, Yegor Krimets “Beytszing Goan” safida harakat qiladi.

• Foto: Xitoy chempionatida to‘p surgan o‘zbekistonlik barcha futbolchilar

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.