Жорий йил пахта йиғим-терими кампанияси давомида (19 сентябрдан 31 октябргача) ходимлар ва 18 ёшгача бўлган болаларни пахта теришга мажбурлагани учун умумтаълим мактабларининг 3, касб-ҳунар коллежининг 2 директори, фермер хўжалигининг 2 раиси ва бир поликлиника бош шифокори маъмурий жавобгарликка тортилди. Уларга жами 4,7 миллион сўм жарима қўлланди. Бу ҳақда Меҳнат вазирлиги ахборот хизматига таяниб, «Газета.uz» хабар берди.
Вазирлик меҳнат-ҳуқуқий инспекцияси «Ишонч телефони» орқали келиб тушган 30 шикоятдан 10 таси бўйича чоралар кўрилди, 7 мурожаат юзасидан тушунтириш ишлари олиб борилди, 13 ҳолат бўйича қонун бузилиши тасдиқланмади.
Инспекция томонидан болалар меҳнати ва мажбурий меҳнатга йўл қўйилмаслиги бўйича меҳнат қонунчилигига риоя этилиши назорати давомида 14 та қонун бузилиши, жумладан, 5 та ўз вақтида иш ҳақи тўламаслик ва 9 та ишга ёллаш шартларини таъминламаслик ҳолати аниқланди. Бу ҳолатлар юзасидан 2 нафар поликлиника бош шифокори, бир нафардан коллеж директори, фермер хўжалиги раҳбари, маҳалла фуқаролар йиғини раиси ва корхона директори огоҳлантирилди.
Ўзбекистоннинг барча шаҳар ва туманларида пахта йиғим-теримига ихтиёрий жалб этилиши билдирилган 500 дан ортиқ баннер ўрнатилди. Жамоатчилик жойларига 386 баннер илинди. Соғлиқни сақлаш, халқ таълими ва ўрта махсус таълим муассасалари, корхона ва ташкилотларда болалар меҳнати ҳамда мажбурий меҳнатга йўл қўйилмаслиги тушунтирилган, Меҳнат вазирлиги ва Касаба уюшмалари федерацияси кенгаши «Ишонч телефонлари» кўрсатилган 44,5 минг плакат жойлаштирилди. Иш берувчи ва фермерлар ўртасида меҳнатга мажбурлаш ҳамда болалар меҳнатидан фойдалангани учун маъмурий жавобгарликка тортилиши ҳақидаги 100 минг флаер тарқатилди.
Жорий йили Халқаро меҳнат ташкилоти тавсиясига биноан Ўзбекистонда, хусусан, қишлоқ хўжалиги ишларида мажбурий ва болалар меҳнатига йўл қўйилмаслиги бўйича миллий мониторинг фақат мустақил жамоат ташкилотлари томонидан ўтказилди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)