Joriy yil paxta yig‘im-terimi kampaniyasi davomida (19-sentabrdan 31-oktabrgacha) xodimlar va 18 yoshgacha bo‘lgan bolalarni paxta terishga majburlagani uchun umumta’lim maktablarining 3, kasb-hunar kollejining 2 direktori, fermer xo‘jaligining 2 raisi va bir poliklinika bosh shifokori ma’muriy javobgarlikka tortildi. Ularga jami 4,7 million so‘m jarima qo‘llandi. Bu haqda Mehnat vazirligi axborot xizmatiga tayanib, “Gazeta.uz” xabar berdi.
Vazirlik mehnat-huquqiy inspeksiyasi “Ishonch telefoni” orqali kelib tushgan 30 shikoyatdan 10 tasi bo‘yicha choralar ko‘rildi, 7 murojaat yuzasidan tushuntirish ishlari olib borildi, 13 holat bo‘yicha qonun buzilishi tasdiqlanmadi.
Inspeksiya tomonidan bolalar mehnati va majburiy mehnatga yo‘l qo‘yilmasligi bo‘yicha mehnat qonunchiligiga rioya etilishi nazorati davomida 14 ta qonun buzilishi, jumladan, 5 ta o‘z vaqtida ish haqi to‘lamaslik va 9 ta ishga yollash shartlarini ta’minlamaslik holati aniqlandi. Bu holatlar yuzasidan 2 nafar poliklinika bosh shifokori, bir nafardan kollej direktori, fermer xo‘jaligi rahbari, mahalla fuqarolar yig‘ini raisi va korxona direktori ogohlantirildi.
O‘zbekistonning barcha shahar va tumanlarida paxta yig‘im-terimiga ixtiyoriy jalb etilishi bildirilgan 500 dan ortiq banner o‘rnatildi. Jamoatchilik joylariga 386 banner ilindi. Sog‘liqni saqlash, xalq ta’limi va o‘rta maxsus ta’lim muassasalari, korxona va tashkilotlarda bolalar mehnati hamda majburiy mehnatga yo‘l qo‘yilmasligi tushuntirilgan, Mehnat vazirligi va Kasaba uyushmalari federatsiyasi kengashi “Ishonch telefonlari” ko‘rsatilgan 44,5 ming plakat joylashtirildi. Ish beruvchi va fermerlar o‘rtasida mehnatga majburlash hamda bolalar mehnatidan foydalangani uchun ma’muriy javobgarlikka tortilishi haqidagi 100 ming flayer tarqatildi.
Joriy yili Xalqaro mehnat tashkiloti tavsiyasiga binoan O‘zbekistonda, xususan, qishloq xo‘jaligi ishlarida majburiy va bolalar mehnatiga yo‘l qo‘yilmasligi bo‘yicha milliy monitoring faqat mustaqil jamoat tashkilotlari tomonidan o‘tkazildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)