Футбол бўйича Ўзбекистон миллий терма жамоаси ФИФА рейтингида 62-поғонасидан қимирламади

Халқаро футбол уюшмаси ФИФА терма жамоаларнинг янги рейтингини эълон қилди. Рейтингнинг янги кўриниши ташкилот расмий сайтидан жой олган.

Унга кўра, Самвел Бабаян устозлик қилаётган Ўзбекистон миллий терма жамоаси 24 ноябрь куни эълон қилинган рейтингда бўлгани каби 62-поғонасини сақлаб қолган. Ўшанда жамоа 14 ўрин пастга шўнғиганди. Қайд этиш керак, ўтган вақт ичида терма расмий ва ўртоқлик ўйинларида иштирок этмади.

Ўзбекистон термасининг бу кўрсаткичи Осиё мамлакатлари орасида олтинчидир. Қитъада энг яхши натижа Карлуш Кейруш мураббийлик қиладиган ва ЖЧ—2018 саралашида Ўзбекистон билан бир гуруҳдан жой олган Эронга тегишли. Форслар рейтингда 29-ўриндан жой олган.

Мос равишда, Жанубий Корея — 37, Япония — 45, Австралия — 47, Саудия Арабистони эса 54-ўринни эгаллаб турибди.

Умумий кўринишда рейтингни 1634 очко билан Аргентина терма жамоаси бошқариб турибди. Кучли учликни Бразилия ва Германия якунлаган бўлса, ўнталикдан Чили, Бельгия, Колумбия, Франция, Португалия, Уругвай ва Испания жой олган.

Маълумот учун, Ўзбекистон миллий терма жамоаси қишки йиғинлар доирасида 2 та ўртоқлик ўйинида майдонга тушади. 23 январь куни Амирликлар йиғини доирасида Грузия билан ўйин келишиб қўйилган, 12 февраль кунги Арманистонга қарши ўйинга эса Туркия мезбонлик қилади. Учрашувлар санаси ФИФА кунларидан ташқарида бўлгани учун, уларда катта эҳтимол билан легионер футболчилар иштирок этмайди.

Ўзбекистон миллий терма жамоасининг олдиндаги илк расмий ўйини 23 март куни ЖЧ—2018 саралаши доирасида Сурияга қарши бўлиб ўтади.