2016 йилнинг 20 декабрь куни Ўзбекистон Касаба уюшмалари федерацияси Кенгашининг навбатдан ташқари мажлиси бўлиб ўтди. Бу ҳақда федерация расмий сайти хабар бермоқда.
Унда Федерация Кенгаши аъзолари ва масъул ходимлари, тармоқ касаба уюшмалари Республика кенгашлари ҳамда ҳудудий касаба уюшмалари ташкилотлари бирлашмалари раислари иштирок этди.
Мажлисни Ўзбекистон Республикаси Бош вазири ўринбосари Т.Нарбаева олиб борди.
Касаба уюшмалари федерацияси Кенгашининг навбатдан ташқари йиғилишида ташкилий масала кўрилди.
2010 йил 21 декабрдан Ўзбекистон Касаба уюшмалари федерацияси раиси лавозимида ишлаб келаётган Нарбаева Танзила Камаловна 2016 йил 14 декабрда Ўзбекистон Республикаси Бош вазирининг ўринбосари – Хотин-қизлар қўмитаси раиси лавозимига тасдиқлангани муносабати билан «Жиззах аккумулятор заводи» АЖ Бош директори лавозимида ишлаб келаётган Рафиков Қудратилла Мирсагатович Ўзбекистон касаба уюшмалари Федерацияси раиси этиб сайланди.
Рафиков Қудратилла Мирсагатович меҳнат фаолияти давомида қатор давлат ва жамоат ташкилотларида раҳбарлик лавозимларида ишлаган.
1993—1998 йилларда Ўзбекистон Касаба уюшмалари федерацияси Кенгаши раиси муовини, 1998 йилдан 2003 йилгача Жиззах вилояти касаба уюшмалари Кенгаши раиси лавозимида фаолият кўрсатган.
Йиғилишда Ўзбекистон Республикаси Бош вазири Арипов Абдулла Нигматович, Ўзбекистон Республикаси Президентининг Давлат маслаҳатчиси Даврон Абитович Назармуҳаммедов иштирок этди.
Изоҳ (0)