Хитойнинг TEB (Transit Elevated Bus) порталли автобуси, ёки Хитой матбуоти таъкидлаганидек «келажак автобуси» журналистлар томонидан Шанхайнинг чекка қисмидан топилди. Уларнинг сўзларига қараганда, автобус ташландиқ кўринишга эга, қачонлардир катта истиқболга эга бўлган лойиҳа яратувчилари эса алоқага чиқмай қўйган, деб ёзади TJournal.
Нашрнинг маълум қилишича, автобус икки ойдан буён синов йўлидаги айвон остида чанг босиб ётибди. Журналистларнинг сўзларига қараганда, келажак транспортини бир неча қўриқчи қўриқламоқда. Улар автобусни яратган компания менежери алоқага чиқмаётганлиги ва икки ойдан буён автобус билан ҳеч кимнинг иши йўқлигини маълум қилган.
Тагидан машиналар ўтиши мумкин бўлган автобус консепти 2016 йилнинг майида тақдим этилган эди. 2 август куни эса автобуснинг амалдаги модели намойиш этилди. У ҳақда маҳаллий матбуотда таҳсинли фикрлар пайдо бўлди. Бироқ тақдимотдан бир ҳафта ўтиб, журналистлар автобус яратувчиларини йирик қаллобликда гумон қилиб, у ҳақдаги фикрларини ўзгартирди.
Лойиҳанинг бош муҳандиси сифатида таништирилган одам ҳатто ўрта маълумотга эга эмаслиги, автобусни яратиш учун пул тиккан одамларга эса ҳеч қандай молиявий кафолат берилмаганлиги аниқланди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)