2017 йил 1 апрелдан Ўзбекистон 15 мамлакат сайёҳлари ҳамда 12 давлатнинг 55 ёшдан ошган сайёҳлари учун виза тартибини бекор қилади. Бу ҳақда «Газета.uz» хабар бермоқда.
2017 йил 1 апрелдан Ўзбекистон мамлакатга 30 кундан зиёд бўлмаган муддатга сайёҳлик мақсадида келган Австралия, Австрия, Буюк Британия, Германия, Дания, Испания, Италия, Канада, Люксембург, Нидерландия, Жанубий Корея, Сингапур, Финляндия, Швейцария ва Япония фуқаролари учун виза тартибини бекор қилади. Бу Президентнинг 2 декабрдаги «Ўзбекистон Республикаси сайёҳлик соҳасини ривожлантиришни тезлаштириш чора-тадбирлари тўғрисида»ги қарорида белгиланган.
Қўшимча равишда, Бельгия Қироллиги, Индонезия, Хитой (сайёҳлик гуруҳлари таркибида), Малайзия, АҚШ, Франция, Вьетнам, Исроил, Польша, Венгрия, Португалия ва Чехиянинг 30 кундан зиёд бўлмаган муддатда сайёҳлик мақсадида Ўзбекистонга ташриф буюрувчи 55 ёшдан ошган фуқаролари учун виза тартиби бекор қилинади.
Кўрсатиб ўтилган давлатлар фуқаролари Ўзбекистонга киришда 50 АҚШ доллари миқдоридаги кириш йиғимини тўлайди, мазкур маблағлар давлат бюджетига ўтказилади. Кириш йиғими тўланганини тасдиқловчи ҳужжат мамлакатга кириш учун асос бўлиб хизмат қилади.
Мутасадди давлат ташкилотларига келгуси йилнинг апрелигача бўлган муддатда Тошкент, Самарқанд, Бухоро ва Урганчдаги халқаро аэропортларда республикага келаётган ва ундан кетаётган чет эллик сайёҳлар учун паспорт ва божхона назорати, юкларни олиш ва транспорт хизмати соддалаштирилган «яшил коридор» божхона назорати тизимини жорий этиш бўйича зарур чораларни амалга ошириш вазифаси топширилди.
Ўзбекистоннинг аэропорт ва вокзалларида чет эл фуқароларига қўшимча қулайлик яратиш ҳамда жараёнларни тезлаштириш мақсадида резидент ва норезидентлар учун алоҳида паспорт назоратидан ўтиш ташкил этилади.
Тегишли тузилмаларга қўшимча равишда йўловчиларга бепул асосда кўрсатилаётган хизмат кўрсатиш даражаси ва сифатини ошириш, аэропорт ва темир йўл вокзалларида қулай сайёҳлик информацион муҳити, жумладан, сайёҳлик-маълумот пунктлари, сайёҳлик навигация тизимлари, мўлжал олиш белгилари ва бошқаларни ташкил этиш топширилди.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)