Норберт Хофер Австриядаги президент сайловида мағлубиятини тан олди

Австрия Озодлик партиясидан мамлакат президентлигига номзод Норберт Хофер қайта ўтказилган сайловда мағлуб бўлганини тан олди. Бу ҳақда у Facebook’даги саҳифасида жойлаштирган баёнотида маълум қилди, деб хабар беради «ТАСС».

«Азиз дўстлар, қўллаб-қувватлаганингиз учун раҳмат, уддалай олмаганимиздан жуда таъбим хира бўлди», — деб ёзди сиёсатчи ўз саҳифасида.

Сайловда унинг рақобатчиси мустақил номзод, Яшиллар партиясининг собиқ етакчиси Александр ван дер Беллен эди.

APА агентлиги маълумотларига қараганда, шу пайтгача 56 фоиз бюллетенлар кўриб чиқилди. Уларнинг натижаларига кўра, ван дер Беллен 53,5 фоиз, Хофер эса 46,7 фоиз овоз тўплади.

Сайлов якунлари 5 декабрь куни эълон қилинади.