Бугун, 4 декабрь куни Ўзбекистонда муҳим сиёсий тадбир — Президент сайлови бўлиб ўтмоқда. Унда спортчилар ҳам фаол иштирок этяпти, деб хабар бермоқда ЎзА.
Оғир атлетика бўйича Осиё ва жаҳон чемпиони, Рио–2016 Олимпия ўйинлари ғолиби, «Ўзбекистон Республикасида хизмат кўрсатган спортчи» ва «Ўзбекистон ифтихори» фахрий унвонлари, «Эл-юрт ҳурмати» ордени соҳиби Руслан Нурудинов Тошкентдаги Учтепа туманидаги 23-сайлов участкасида ўзи танлаган номзодга овоз берди.
«Сайловда қатнашиш Ватанимизнинг бугуни ва келажагига бефарқ бўлмаган ҳар бир фуқаро учун муҳим аҳамиятга эга. Бугун мен ҳам Ўзбекистон Республикаси Президенти сайловида қатнашиб, ана шу тараққиёт йўлимизни янада мустаҳкамлаш, Ватанимиз равнақига ҳисса қўшиш, шу мақсад йўлида халқни бирлаштиришга қодир, деб билган муносиб номзодга овоз бердим», – деди Руслан Нурудинов.
Таэквондо (ITF) бўйича икки карра Осиё, икки карра жаҳон чемпиони, Зулфия номидаги Давлат мукофоти совриндори, Алишер Навоий номидаги давлат стипендияси соҳибаси Дилбар Холжигитова Гулистон шаҳридаги 3-сайлов участкасида ўзи танлаган номзодга овоз берди.
«Сайлов – муносиблар ичра муносибини танлаш демакдир. Фуқаролар конституциявий ҳуқуқидан фойдаланган ҳолда Ўзбекистон Республикаси Президенти сайловида қатнашиш асносида фаровон ва бахтли ҳаёти, ўз келажаги учун овоз бераётганини чуқур ҳис қилмоқда. Мен ҳам сайловда қатнашиб, муносиб номзодга овоз бердим», – деди Дилбар Холжигитова.
Сузиш бўйича Ўзбекистон терма жамоаси аъзоси, XV ёзги Паралимпия ўйинлари ғолиби, «Ўзбекистон ифтихори» фахрий унвони соҳиби Фирдавсбек Мусабеков Андижон шаҳридаги 73-сайлов участкасида ўзи танлаган номзодга овоз берди.
«Сайлов билан боғлиқ барча маълумотларни катта қизиқиш билан ўрганиб чиқдим. Барча номзодларнинг сайловолди дастурлари билан танишдим. Бош қомусимизда белгиланган ҳуқуқимдан фойдаланган ҳолда, халқимиз ҳаётидаги муҳим сиёсий воқеа – Ўзбекистон Республикаси Президенти сайловида қатнашиб, тинчлигимизни, тараққиётимизни, буюк келажагимизни таъминлай оладиган муносиб номзодга овоз бердим», – деди Фирдавсбек Мусабеков.
Рио–2016 Паралимпия ўйинларида Ўзбекистон шарафини муносиб ҳимоя қилиб, дзюдо бўйича олтин медални қўлга киритган Ўткиржон Неъматов Самарқанд шаҳридаги Лоҳутий ва Гулбаҳор маҳалларидаги 76-сайлов участкасига ташриф буюриб, ўзи муносиб деб билган номзод учун овоз берди.
«Бугунги сайловда юртимизнинг барча фуқаролари қатори спортчилар ҳам фаол иштирок этмоқда. Бу сайлов Ўзбекистонимизнинг буюк келажагини, юртимизнинг янада обод, ҳаётимизнинг фаровон бўлишида муҳим аҳамиятга эга. Президентликка номзодга овоз беришда ана шундай ниятларни дилимга тугдим», – деди Ўткиржон Неъматов.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)