Bugun, 4-dekabr kuni O‘zbekistonda muhim siyosiy tadbir — Prezident saylovi bo‘lib o‘tmoqda. Unda sportchilar ham faol ishtirok etyapti, deb xabar bermoqda O‘zA.
Og‘ir atletika bo‘yicha Osiyo va jahon chempioni, Rio–2016 Olimpiya o‘yinlari g‘olibi, “O‘zbekiston Respublikasida xizmat ko‘rsatgan sportchi” va “O‘zbekiston iftixori” faxriy unvonlari, “El-yurt hurmati” ordeni sohibi Ruslan Nurudinov Toshkentdagi Uchtepa tumanidagi 23-saylov uchastkasida o‘zi tanlagan nomzodga ovoz berdi.
“Saylovda qatnashish Vatanimizning buguni va kelajagiga befarq bo‘lmagan har bir fuqaro uchun muhim ahamiyatga ega. Bugun men ham O‘zbekiston Respublikasi Prezidenti saylovida qatnashib, ana shu taraqqiyot yo‘limizni yanada mustahkamlash, Vatanimiz ravnaqiga hissa qo‘shish, shu maqsad yo‘lida xalqni birlashtirishga qodir, deb bilgan munosib nomzodga ovoz berdim”, – dedi Ruslan Nurudinov.
Taekvondo (ITF) bo‘yicha ikki karra Osiyo, ikki karra jahon chempioni, Zulfiya nomidagi Davlat mukofoti sovrindori, Alisher Navoiy nomidagi davlat stipendiyasi sohibasi Dilbar Xoljigitova Guliston shahridagi 3-saylov uchastkasida o‘zi tanlagan nomzodga ovoz berdi.
“Saylov – munosiblar ichra munosibini tanlash demakdir. Fuqarolar konstitutsiyaviy huquqidan foydalangan holda O‘zbekiston Respublikasi Prezidenti saylovida qatnashish asnosida farovon va baxtli hayoti, o‘z kelajagi uchun ovoz berayotganini chuqur his qilmoqda. Men ham saylovda qatnashib, munosib nomzodga ovoz berdim”, – dedi Dilbar Xoljigitova.
Suzish bo‘yicha O‘zbekiston terma jamoasi a’zosi, XV yozgi Paralimpiya o‘yinlari g‘olibi, “O‘zbekiston iftixori” faxriy unvoni sohibi Firdavsbek Musabekov Andijon shahridagi 73-saylov uchastkasida o‘zi tanlagan nomzodga ovoz berdi.
“Saylov bilan bog‘liq barcha ma’lumotlarni katta qiziqish bilan o‘rganib chiqdim. Barcha nomzodlarning saylovoldi dasturlari bilan tanishdim. Bosh qomusimizda belgilangan huquqimdan foydalangan holda, xalqimiz hayotidagi muhim siyosiy voqea – O‘zbekiston Respublikasi Prezidenti saylovida qatnashib, tinchligimizni, taraqqiyotimizni, buyuk kelajagimizni ta’minlay oladigan munosib nomzodga ovoz berdim”, – dedi Firdavsbek Musabekov.
Rio–2016 Paralimpiya o‘yinlarida O‘zbekiston sharafini munosib himoya qilib, dzyudo bo‘yicha oltin medalni qo‘lga kiritgan O‘tkirjon Ne’matov Samarqand shahridagi Lohutiy va Gulbahor mahallaridagi 76-saylov uchastkasiga tashrif buyurib, o‘zi munosib deb bilgan nomzod uchun ovoz berdi.
“Bugungi saylovda yurtimizning barcha fuqarolari qatori sportchilar ham faol ishtirok etmoqda. Bu saylov O‘zbekistonimizning buyuk kelajagini, yurtimizning yanada obod, hayotimizning farovon bo‘lishida muhim ahamiyatga ega. Prezidentlikka nomzodga ovoz berishda ana shunday niyatlarni dilimga tugdim”, – dedi O‘tkirjon Ne’matov.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)