Колумбиянинг «Атлетико Насьональ» футбол клуби Жанубий Америка футбол конфедрацияси (КОНМЕБОЛ)га авиаҳалокатга учраган Бразилиянинг «Шапекоэнсе» клубини Жанубий Америка Кубоги – Копа Судамерикано ғолиби деб эълон қилиш таклифини билдирди. Бу ҳақда «ТАСС» хабар бермоқда.
Боливиянинг Lamia авиакомпаниясига тегишли ҳаво кемаси Боливиянинг Санта-Крус-де-ла-Сьерра шаҳридан Колумбиянинг Меделин шаҳрига йўл олаётган эди. Самолёт Рионегро шаҳри яқинида ҳалокатга учради. Лайнер бортида 72 йўловчи ҳамда 9 нафар экипаж аъзоси бўлган. Самолёт ичида футбол бўйича Бразилия А сериясида ҳаракат қилаётган «Шапекоэнсе» клубининг 27 футболчиси бўлгани ҳам хабар қилинганди.
Сўнгги маълумотларга кўра, «Шапекоэнсе» клубининг икки футболчиси – захира дарвозабони Жексон Фоллманн ва ҳимоячи Алан Рушель тирик қолган. Қутқарувчилар томонидан тирик топилган жамоанинг асосий посбони Данило кейинроқ шифохонада жон берди.
«Шапекоэнсе» футболчилари 1 декабрь куни Копа Судамерикано мусобақаси финал баҳси илк учрашуви доирасида «Атлетико Насьональ» клубига қарши майдонга тушиши керак бўлган. «Шапекоэнсе» ўз тарихида илк бор мазкур мусобақанинг финал беллашувига чиққан эди.
Маълумот учун, Копа Судамерикано Жанубий Америка минтақаси клублари ўртасидаги Копа Либертадорес турниридан кейин нуфузи жиҳатдан иккинчи ўринда турадиган мусобақадир.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)