«Ақл бовар қилмайди!». Оқсарой олдидаги ярим километрлик йўлдан бемалол ўтган ҳайдовчилар ўз таассуротлари билан ўртоқлашди

Тошкентда 29 ноябрь куни Афросиёб кўчасининг Оқсарой қароргоҳи олдидан ўтган, Рашидов ва Бешёғоч кўчаларини боғловчи қарийб ярим километрлик бўлаги транспорт ҳаракати учун очилди.

Мазкур янгилик ҳайдовчилар томонидан хурсандчилик билан қарши олинди. Улар Facebook’даги «Водители Ташкента» ва «Водители Ташкента (Drivers.uz)» гуруҳларида ўз таассуротлари билан ўртоқлашган.

«Ақл бовар қилмайди. Лекин яхши ва қулай!», — деб ёзади бу йўлдан ўтиш вақтида Оқсарой қароргоҳини ҳам суратга туширишга улгурган ҳайдовчилардан бири.

«Ур-ре, ҳозиргина бу йўлдан ўтдим — ҳеч ким тўхтатмади!», — дейди яна бир фойдаланувчи.

Йўл очилган куни ундан ўтиб кўрган бошқа бир фойдаланувчи эса: «Бутун умр ўзимни Президентдек ҳис қилиб кўришни хоҳлардим», — деб, йўлдан сурат улашган.

«Водители Ташкента» фойдаланувчиларининг ёзишича, Афросиёб кўчасининг бу қисми 1999 йилдан бери ёпиқ эди. Кўпчилик «бу йўл қачон ёпилган эди», деган саволга «эслолмайман», деб жавоб берган.

Фойдаланувчилар Оқсарой олдидаги йўлдан нафақат фотолар, балки видеолар ҳам улашган. Фойдаланувчилардан бири бу воқеага: «Йўлларни либераллаштириш ҳам бошланди», — деб таъриф берган.

«Водители Ташкента» ва «Водители Ташкента (Drivers.uz)» аъзолари Тошкентдаги аввал ёпилган ёки транспорт ҳаракати чекланган бошқа кўча ва йўллар ҳам очилишига умид билдирган.

Хусусан, Марказ-5 мавзесидан Мустақиллик майдонига олиб чиқиладиган йўл қайта тикланса, Олой бозори олдидаги тирбандлик қисман ечилиши айтилган.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.