«Миллий тикланиш» партиясидан Ўзбекистон Республикаси Президентлигига номзод Сарвар Отамуратовнинг ишончли вакили С. Ҳамроев Бухоро вилояти Қоракўл тумани сайловчилари билан учрашди. Ишончли вакил номзоднинг сайловолди дастури, ундаги энг муҳим йўналишлар ҳақида сўз юритди, деб хабар беради ЎзА.
Дастур етти устувор йўналишдан иборат. Унда асосан маънавий-маърифий соҳада эришилган ютуқларни мустаҳкамлаш ва бу борада амалга оширилаётган ислоҳотларни янада кенгайтириш, бетакрор тарихий, маданий ва интеллектуал мерос, маданият ва анъаналарни асраб-авайлаш, бойитиш, уни аҳоли, айниқса, навқирон авлод орасида кенг тарғиб қилишга алоҳида эътибор қаратилган.
Қадимий ва бой тарихга эга ўзбек тилининг давлат тили сифатидаги мақомини мустаҳкамлаш ва унинг тўла амал қилишига эришиш, тил маданиятини янада юксалтиришга йўналтирилган чора-тадбирлар мажмуасини ишлаб чиқиш, миллий ғоя, жамиятнинг маънавий-ахлоқий асослари устуворлигини таъминлаш, мамлакатда ҳукм сураётган тинчлик-осойишталикни, бағрикенглик, тотувлик ва меҳр-оқибат муҳитини янада мустаҳкамлаш вазифалари илгари сурилган.
Халқаро миқёсда эътироф этилган ва бугунги тараққиётнинг ҳаётий дастурига айланган машҳур беш тамойил асосида амалга оширилаётган ислоҳотлар бардавомлигини таъминлаш, бой тарихий, маданий, маънавий-ахлоқий қадрият ва анъаналар асосида жамиятда юксак ҳуқуқий ва сиёсий маданиятни юксалтириш масаласига устувор аҳамият қаратилган.
Учрашувда Қоракўл тумани «Хўжалар» маҳалла фуқаролар йиғини раиси Қ. Ҳалимова, Республика Маънавият тарғибот маркази туман бўлими раҳбари Қ. Давлатов, Қоракўл тиббиёт коллежи ўқитувчиси Н. Сулаймонова ва бошқалар Президентликка номзоднинг сайловолди дастури ва унда илгари сурилган вазифалар хусусида фикр билдирди.
Ишончли вакил сайловчиларни қизиқтирган саволларга жавоб қайтарди.
Изоҳ (0)