“Milliy tiklanish” partiyasidan O‘zbekiston Respublikasi Prezidentligiga nomzod Sarvar Otamuratovning ishonchli vakili S. Hamroyev Buxoro viloyati Qorako‘l tumani saylovchilari bilan uchrashdi. Ishonchli vakil nomzodning saylovoldi dasturi, undagi eng muhim yo‘nalishlar haqida so‘z yuritdi, deb xabar beradi O‘zA.

Dastur yetti ustuvor yo‘nalishdan iborat. Unda asosan ma’naviy-ma’rifiy sohada erishilgan yutuqlarni mustahkamlash va bu borada amalga oshirilayotgan islohotlarni yanada kengaytirish, betakror tarixiy, madaniy va intellektual meros, madaniyat va an’analarni asrab-avaylash, boyitish, uni aholi, ayniqsa, navqiron avlod orasida keng targ‘ib qilishga alohida e’tibor qaratilgan.

Qadimiy va boy tarixga ega o‘zbek tilining davlat tili sifatidagi maqomini mustahkamlash va uning to‘la amal qilishiga erishish, til madaniyatini yanada yuksaltirishga yo‘naltirilgan chora-tadbirlar majmuasini ishlab chiqish, milliy g‘oya, jamiyatning ma’naviy-axloqiy asoslari ustuvorligini ta’minlash, mamlakatda hukm surayotgan tinchlik-osoyishtalikni, bag‘rikenglik, totuvlik va mehr-oqibat muhitini yanada mustahkamlash vazifalari ilgari surilgan.

Xalqaro miqyosda e’tirof etilgan va bugungi taraqqiyotning hayotiy dasturiga aylangan mashhur besh tamoyil asosida amalga oshirilayotgan islohotlar bardavomligini ta’minlash, boy tarixiy, madaniy, ma’naviy-axloqiy qadriyat va an’analar asosida jamiyatda yuksak huquqiy va siyosiy madaniyatni yuksaltirish masalasiga ustuvor ahamiyat qaratilgan.

Uchrashuvda Qorako‘l tumani “Xo‘jalar” mahalla fuqarolar yig‘ini raisi Q. Halimova, Respublika Ma’naviyat targ‘ibot markazi tuman bo‘limi rahbari Q. Davlatov, Qorako‘l tibbiyot kolleji o‘qituvchisi N. Sulaymonova va boshqalar Prezidentlikka nomzodning saylovoldi dasturi va unda ilgari surilgan vazifalar xususida fikr bildirdi.

Ishonchli vakil saylovchilarni qiziqtirgan savollarga javob qaytardi.