25 ноябрь куни Ўзбекистон Республикаси Президенти сайловини ёритиш бўйича Республика матбуот марказида Марказий сайлов комиссиясининг навбатдаги мажлиси бўлиб ўтди. Видеоконференцалоқа шаклида ўтказилган тадбирда Ўзбекистон Республикаси Президенти сайловини ўтказувчи округ сайлов комиссиялари аъзолари, сиёсий партиялар вакиллари, халқаро кузатувчилар, журналистлар иштирок этди, деб хабар беради ЎзА.
Мажлисда Президентликка номзодларнинг сайловолди ташвиқоти бўйича мониторингнинг дастлабки натижалари кўриб чиқилди.
Номзодлар жорий йилнинг 28 октябридан бошлаб мамлакатни ижтимоий-иқтисодий ривожлантириш бўйича ўз ғоя ва қарашлари, таклиф ва ташаббуслари акс этган сайловолди дастурларини сайловчилар, умуман, кенг жамоатчиликка етказишга йўналтирилган ташвиқот тадбирларини олиб бормоқда. Сайловолди ташвиқотини олиб боришда, жумладан, оммавий ахборот воситалари имкониятларидан фойдаланишда номзодларга тенг шароит таъминланмоқда.
Номзодлар Ўзбекистон Миллий телерадиокомпаниясининг «Ўзбекистон» ва «Ёшлар» телерадиоканаллари, ҳудудий теле ва радиоканалларда тақдим этилган бепул эфир вақти, шунингдек, «Халқ сўзи», «Народное слово», «Правда Востока», «Нурли жол» ва «Овози тожик» газеталари, ҳудудий газеталарда ажратилган бепул нашр майдонидан ташвиқот мақсадида самарали фойдаланмоқда.
Номзодлар ва оммавий ахборот воситалари «Ўзбекистон Республикаси Президенти сайлови тўғрисида»ги қонун ва Ўзбекистон Республикаси Марказий сайлов комиссиясининг 2016 йил 3 октябрдаги қарори билан тасдиқланган Ўзбекистон Республикаси Президентлигига номзодларнинг сайловолди ташвиқотини олиб бориш тартиби тўғрисидаги низом талабларига қатъий амал қилиб келмоқда. Сайловолди ташвиқотининг ўтган даврида сайлов қонунчилиги бузилиши ҳолатлари қайд этилмади.
Мажлисда овоз беришга тайёргарлик кўриш ва уни ўтказиш масалалари ҳам кўриб чиқилди. Ўзбекистон Республикаси Президенти сайловига тайёргарлик кўриш ва уни ўтказиш бўйича асосий тадбирлар дастурини амалга ошириш доирасида барча бўғиндаги сайлов комиссиялари томонидан фуқароларнинг сайлов ҳуқуқларини таъминлаш юзасидан катта иш олиб борилмоқда.
Ўзбекистон Республикаси Президенти сайловини ўтказиш учун сайлов участкалари, жумладан, Ўзбекистон Республикасининг хорижий давлатлардаги ваколатхоналари ҳузурида 44 сайлов участкаси тузилиб, зарур жиҳозлар билан таъминланди. Ҳар бир сайлов участкасида Ўзбекистон Республикаси Президентлигига номзодлар ҳақида ахборот мавжуд. Участка сайлов комиссиялари томонидан сайловчиларни овоз бериш вақти ва жойи ҳақида хабардор қилиш бўйича ишлар олиб борилмоқда. Телерадиоканалларда сайлов санаси ҳақида информацион роликлар, муддатидан олдин овоз бериш, сайлов куни овоз бериш тартиби, сайлов бюллетени, шунингдек, участка сайлов комиссияларининг сайлов кунидаги фаолияти ҳақида кўрсатув, видеоролик, эшиттиришлар эфирга узатилмоқда.
Бугунги кунда сайлов куни ўз яшаш манзилида бўлиш имконияти йўқ сайловчилар учун муддатидан олдин овоз бериш жараёни давом этмоқда.
Сайлов куни овоз бериш жараёнини онлайн режимда кузатиш, мамлакат ҳудудлари билан видеоалоқа орқали мулоқот олиб боришни таъминлаш мақсадида ягона компьютер тармоғи яратилган. Жамоатчиликни сайловнинг бориши ҳақида хабардор қилиш мақсадида Марказий сайлов комиссияси томонидан сайлов куни, яъни 4 декабрда онлайн брифинглар ўтказилади.
Мажлисда Марказий сайлов комиссияси ваколатига тегишли бошқа масалалар ҳам кўриб чиқилиб, тегишли қарорлар қабул қилинди.
Изоҳ (0)