«Ўзбекистон Республикаси Президенти сайловини ёритишда мамлакат нодавлат телерадиостудиялари томонидан халқаро стандартларнинг қўлланилиши: миллий тажриба ва дунё амалиёти» мавзусидаги халқаро давра суҳбати «Президент сайлови мамлакат нодавлат телерадиостудиялари томонидан қандай ёритилмоқда?», «Мамлакатдаги мустақил студиялар халқаро стандартларга риоя этяптими?», «Тарғибот фаолияти давомида партиялар ва номзодларнинг ҳуқуқлари бузилмаяптими?» каби саволлар билан очилди. Бу ҳақда «Дарё»га Ўзбекистон Электрон ОАВ миллий ассоциацияси матбуот хизмати маълум қилди.
Маҳаллий ва Болгария, Германия, Латвия, Литва, Дания, Франция ҳамда бошқа мамлакатлардан ташриф буюрган халқаро экспертлар, шунингдек, ЎзЭОАВМАнинг тадбир бўйича ҳамкорлари — Марказий сайлов комиссияси, Конрад Аденауэр номидаги фонднинг минтақавий ваколатхонаси, ЮНЕСКОнинг Ўзбекистондаги ваколатхонаси, партиялар, давлат ва жамоат ташкилотлари вакиллари анжуманда мана шу ва бошқа саволларга жавоб излади.
Марказий сайлов комиссияси ҳамда ассоциация томонидан Президент сайловини ёритиш тўғрисидаги икки томонлама битим имзолангандан кейин нодавлат телерадиостудиялар журналистлари сўнгги йилларда давлат ТВга жиддий рақобат туғдирган ва рекорд даражага етган медиа-контент миқдори тўғрисидагина эмас, балки сайлов мавзусидаги контентнинг сифати ва унинг халқаро стандартларга мос бўлиши ҳақида ҳам жиддий ўйлади. Буни Латвиянинг «Телеграф» журнали бош муҳаррири Андрей Шведов шундай шарҳлайди:
«Нодавлат телевидение ва Ўзбекистон Марказий сайлов комиссияси ўртасида имзоланган битимни жуда муҳим, деб ҳисоблайман. Нодавлат каналларни сайловни ёритишга жалб этилиши Ўзбекистон сайловчиларига сайлов жараёни, давлат раҳбари лавозимига даъвогарлик қилаётган номзодлар ҳақида кўпроқ билиш имконини беради. Бу ерда мен Ригадан, Латвия, сайловларни ёритган бизнинг масс-медиадан ҳеч бир фарқни кўрмаяпман. Менимча, бу ерда ҳамма жиҳатларга тўла риоя қилинмоқда, қолгани эса Президентликка номзодларнинг ўзларига боғлиқ. Агар мағлубиятга учраган номзод ОАВ устидан шикоят қиладиган бўлса, бу ОАВнинг айби эмас. Ҳозирги ҳолатда ОАВ вазиятни мутлақо ҳаққоний акс эттирмоқда, қолганини сайловлар кўрсатади».
Сайлов мавзусидаги контентларни бойитиш мақсадида сўнгги бир неча ой давомида таниқли халқаро экспертлар иштирокида журналистларнинг сайлов мавзуси бўйича касбий маҳоратини оширишга қаратилган 8 та семинар-тренинг ўтказилди.
Ҳозирга қадар 450 га яқин медиа-маҳсулот тайёрланиб, республикадаги нодавлат телерадиостудиялар эфирига 2 минг мартадан ортиқ узатилди. Сайловнинг моҳияти ва аҳамиятини, асосий қоидалар ва овоз бериш тартиби, сайлов участкалари фаолияти ва бошқа масалаларни тушунтириш мақсадида 40 дан ортиқ ижтимоий роликлар тайёрланди ва улар 4,5 минг мартадан ортиқ эфирга берилди.
Нодавлат сектор бу масалада анъанага кўра, халқаро тажрибага эътибор қаратди. Ассоциация ёш журналистларни ўқитиш учун чет элдан медиа-соҳанинг энг яхши халқаро экспертларини таклиф қилди.
ЮНЕСКОнинг катта маслаҳатчи ва консултанти, халқаро ташкилотнинг сўз эркинлиги бўйича бўлими собиқ директори Могенс Шмидт (Дания) қуйидагиларни таъкидлади:
«Ўзбекистонда сайловларни ёритиш жараёнида ва ОАВ фаолиятида ҳам кўплаб халқаро экспертларнинг қатнашаётгани фавқулодда муҳим ҳисобланади. Масалан, мен ўзим Данияданман. Австралия, Франция, Германия, Латвия, Литвадан ҳам экспертлар бор.
Яъни, шу йўсинда, турлича тажрибага эга бўлган барча экспертларни бир мамлакатга тўплаш орқали Ўзбекистон журналистлари тажрибасини, касбий тажрибасини бойитиш имконияти пайдо бўлади».
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)