Ташқарида ҳаво совуқ, барча фильмларни томоша қилиб, мусиқаларни тинглаб бўлдингизми? У ҳолда анчадан буён орзу қилган бироқ бошлай олмаган севимли машғулотингиз — расм чизишни ўрганиш учун айни пайтда киришишингиз мумкин.
Расм чизиш учун илҳом ва хоҳишнинг пайдо бўлиши, қолаверса, чизган суратларингиз кўзингизни қувнатиши учун расм чизишни босқичма-босқич ўрганиш бўйича тавсияларимизни эътиборингизга ҳавола этамиз.
Агар бу қобилиятга эга эканлигингиз бўйича иккиланаётган бўлсангиз, болалигингизни ёдга олинг. Ахир болаликда ҳар биримиз расм чизишга уста бўламиз.
Қалам билан расм чизишни ўрганиш учун сизга қуйидаги ашёлар керак бўлади:
- Альбом ёки блокнот;
- қора қалам ёки рангли қаламлар тўплами;
- кунига 20—30 дақиқа вақт;
- қулай манзара ёки яхши фантазия;
- илҳом ва хоҳиш;
Энди эса энг осон ва бир вақтнинг ўзида қийин қадам — чизишни бошлаш. Шошилинч бўлмаган ишларни ортга суриб, ижодий кайфиятни яратинг. Бунда ёлғиз қолишингиз ва сизни ҳеч ким чалғитмаслиги ҳам мақсадга мувофиқдир. Олдингизга тоза варақ қўйиб, қўлингизга қалам олинг ва биринчи нуқтани қўйинг. Нима чизиш ҳақида ўйлаб кўринг.
Булар сизни ўраб турган ҳар қандай буюм бўлиши мумкин. Девордаги соат, қаҳва финжони, куз барги, дастурхондаги нақш ва ҳоказо. Чизишни тайёр тасвирлардан бошлаш осонроқ. Шунчаки, сизга маъқул келган картинкани танланг ва уни чизинг. Ёки фантазиянгизни ишга солинг. Қоғозда яқинда ўқиган китобингиздаги нореал дунёни гавдалантиришга уриниб кўринг.
Ҳозирги вақтда интернетдаги роликлар ва босқичма-босқич акс эттирилган картинкалар ёрдамида расм чизишни ўрганиб олиш мумкин. Маҳоратингизни ҳар куни ошира бориб, бир неча ҳафтадан сўнг кичикроқ бўлса-да санъат асарларини ярата оласиз. Улар хонадонингиз кўрки ёки яқинларингизни хурсанд қилувчи совғага айлана олади.
Асосийси, танқиддан чўчимаслик, ахир ҳар қандай буюк ишлар кичкина ишлардан бошланади!
Изоҳ (0)