Ливия жанубидаги Сабҳа шаҳрида иккита душман оила ўртасида тўрт кундан буён давом этаётган қуролли низо натижасида камида 16 киши ҳалок бўлди ва 50 га яқини яраланди, деб ёзади «Корреспондент.net».
Қирғинга маймун сабабчи бўлди. Гап шундаки, Каддадфа уруғидан бўлган дўкондорга тегишли жонивор дўкон ёнидан ўтиб кетаётган ўқувчи қизларга ташланиб қолди. Маймун Авлод Сулаймон уруғи вакили бўлган қизнинг бош кийимини олиб қўйди. Бунинг учун қизнинг қариндошлари ўзларига душман бўлган оиланинг уч вакилини ва маймунни ўлдирди.
Шундан сўнг, маҳаллий фуқаролар сўзларига кўра, шаҳарда танк, миномёт ва бошқа оғир қуроллар иштирокида жанглар бошланди.
Муаммар Қаддафий ҳокимиятдан ағдарилгач, Ливияда қуролли низолар тўхтовсиз давом этмоқда. Пойтахт Триполидан 660 км масофада жойлашган Сабҳа шаҳри тартибсизликлар ўчоғи ва қурол-яроғ контрабандаси марказларидан бири ҳисобланади. Ушбу ҳудуддаги энг таъсири кучли уруғлар — Каддадфа ва Абу Сулаймондир.
Изоҳ (0)