Ўзбекистон миллий терма жамоаси бош мураббийи Самвел Бабаян ва ҳужумчи Игорь Сергеев Жанубий Кореяга қарши беллашув олдидан ўтказилган матбуот анжуманида иштирок этди, деб хабар берди ЎФФ матбуот хизмати.
Журналистларнинг Осиё Кубоги—2015 даги Ўзбекистон термаси ва бугунгиси ўртасида қандай фарқ бор экани ҳақида саволига Бабаян шундай жавоб берди:
«Мен таққосласам тўғри бўлмайди. Бунинг учун журналистлар, мутахассислар ва мухлислар бор. Таркибга 8 нафар янги футболчи қўшилган. Ёшларнинг кўпи турли мундиаллардан иштирок этган».
«Жанубий Кореянинг барча футболчилари тажрибали. Шунинг учун Европанинг кучли клубларида тўп суради. Биз ўзимиз учун хавфли ўйинчиларни белгилаб олганмиз. Фақат уларнинг исм-шарифларини айтмайман», — деди Бабаян.
Сеулга кеч етиб келингани борасидаги саволга бош мураббий шундай жавоб берди: «Биз барчасини ҳисобга олганмиз. Иқлимга мослашиш ва шароитга кўникиш учун вақт етарли. Бу борада ҳеч қандай муаммо йўқ».
Кореялик журналистлар Игорь Сергеевдан Хитой клубида нега кам гол ураётганини билишга ҳаракат қилди: «Бу хориж клубида биринчи бор ўйнашим. Турли сабаблар бор, вақт кам берилди. Мамлакатга мослашиб кетишга муаммоларга дуч келдим. Кўп гол уришга ҳаракат қиляпман. Терма жамоага чақиришдими, демак бор кучинг билан ўйнашинг керак. 2 дақиқа берилса, шундан фойдаланишинг керак».
Игорь Сергеев 2016 йилнинг январида Ўзбекистон олимпия терма жамоасида ҳаракат қилган ва Жанубий Кореяга қарши мағлубият билан якунига етган ўйинда иштирок этганди: «Ўша учрашувда мағлуб бўлмаслигимиз керак эди. Ҳакам ўйинга таъсир қилган хатога йўл қўйган. Эртага эса ғалаба қозониб, қора анъанага барҳам бериш ниятидамиз».
«Кореялик футболчиларга қарши қандай ҳаракат қилиш кераклигини ўзим учун аниқлаштириб олганман. Буни ҳозир айтишим тўғри эмас. Уларнинг ўйин услубини ўрганиб чиққанман», — деб фикрига якун ясади Игорь Сергеев.
Жанубий Корея терма жамоаси бош мураббийи Ули Штиликенинг Ўзбекистон билан ўйин олдидан ташкил этилган матбуот анжуманидаги фикрлари билан мана шу ҳавола ёрдамида танишиш мумкин.
Изоҳ (0)