O‘zbekiston milliy terma jamoasi bosh murabbiyi Samvel Babayan va hujumchi Igor Sergeyev Janubiy Koreyaga qarshi bellashuv oldidan o‘tkazilgan matbuot anjumanida ishtirok etdi, deb xabar berdi O‘FF matbuot xizmati.
Jurnalistlarning Osiyo Kubogi—2015 dagi O‘zbekiston termasi va bugungisi o‘rtasida qanday farq bor ekani haqida savoliga Babayan shunday javob berdi:
“Men taqqoslasam to‘g‘ri bo‘lmaydi. Buning uchun jurnalistlar, mutaxassislar va muxlislar bor. Tarkibga 8 nafar yangi futbolchi qo‘shilgan. Yoshlarning ko‘pi turli mundiallardan ishtirok etgan”.
“Janubiy Koreyaning barcha futbolchilari tajribali. Shuning uchun Yevropaning kuchli klublarida to‘p suradi. Biz o‘zimiz uchun xavfli o‘yinchilarni belgilab olganmiz. Faqat ularning ism-shariflarini aytmayman”, — dedi Babayan.
Seulga kech yetib kelingani borasidagi savolga bosh murabbiy shunday javob berdi: “Biz barchasini hisobga olganmiz. Iqlimga moslashish va sharoitga ko‘nikish uchun vaqt yetarli. Bu borada hech qanday muammo yo‘q”.
Koreyalik jurnalistlar Igor Sergeyevdan Xitoy klubida nega kam gol urayotganini bilishga harakat qildi: “Bu xorij klubida birinchi bor o‘ynashim. Turli sabablar bor, vaqt kam berildi. Mamlakatga moslashib ketishga muammolarga duch keldim. Ko‘p gol urishga harakat qilyapman. Terma jamoaga chaqirishdimi, demak bor kuching bilan o‘ynashing kerak. 2 daqiqa berilsa, shundan foydalanishing kerak”.
Igor Sergeyev 2016-yilning yanvarida O‘zbekiston olimpiya terma jamoasida harakat qilgan va Janubiy Koreyaga qarshi mag‘lubiyat bilan yakuniga yetgan o‘yinda ishtirok etgandi: “O‘sha uchrashuvda mag‘lub bo‘lmasligimiz kerak edi. Hakam o‘yinga ta’sir qilgan xatoga yo‘l qo‘ygan. Ertaga esa g‘alaba qozonib, qora an’anaga barham berish niyatidamiz”.
“Koreyalik futbolchilarga qarshi qanday harakat qilish kerakligini o‘zim uchun aniqlashtirib olganman. Buni hozir aytishim to‘g‘ri emas. Ularning o‘yin uslubini o‘rganib chiqqanman”, — deb fikriga yakun yasadi Igor Sergeyev.
Janubiy Koreya terma jamoasi bosh murabbiyi Uli Shtilikening O‘zbekiston bilan o‘yin oldidan tashkil etilgan matbuot anjumanidagi fikrlari bilan mana shu havola yordamida tanishish mumkin.
Izoh (0)