Samsung 7 ноябрь, душанба куни Wall Street Journal, The New York Times ва The Washington Post каби нуфузли газеталар саҳифалари орқали америкаликлардан Galaxy Note 7 учун узр сўради. Бу ҳақда TJournal хабар бермоқда.
«Бизнинг бош тамойилларимиздан бири бозордаги энг сифатли ва хавфсиз маҳсулотларни ишлаб чиқишдан иборат. Яқинда бунинг уддасидан чиқолмадик ва бу учун кечирим сўраймиз. Смартфоннинг ҳар бир қирраси, жумладан, қурилма таъминоти ва дастурий таъминот, ишлаб чиқариш техникаси, батареялар конструкцияси кўриб чиқилади. Юзага келган муаммога тезроқ ойдинлик киритишга ҳаракат қиламиз, бироқ тўғри ва аниқ жавоблар олиш учун вақт кетади», — дейилади Samsung Electronics North America бош директори Грегори Ли имзолаган матнда.
Нуфузли нашрлар орқали мижозлардан узр сўраш йирик компаниялар орасида оммалашиб бормоқда. Ўтган йил ноябрида Volkswagen «дизелли можаро» учун кечирим сўраш мақсадида шундай йўл тутганди.
Эслатиб ўтамиз, олдинроқ Samsung менежерлари Хитойда Galaxy Note 7 учун тиз чўкиб кечирим сўрагани ҳақида маълум қилинганди.
Изоҳ (0)