Россиядаги Миллий тадқиқот-технология университетида Ўзбекистонда 4 декабрда бўлиб ўтадиган Президент сайловига бағишланган брифинг ўтказилди. Бу ҳақда «Жаҳон» хабар бермоқда.
Ўзбекистоннинг Москвадаги элчихонаси томонидан ташкил этилган тадбирда олий ўқув юрти профессор-ўқитувчилари таркиби вакиллари ҳамда талабалар иштирок этди.
Брифинг иштирокчилари Ўзбекистонда ижтимоий-сиёсий ва социал-иқтисодий соҳаларда амалга оширилаётган ислоҳотлар билан таништирилди. 4 декабрь куни бўлиб ўтадиган Президент сайлови ҳамда сайловолди кампаниясига алоҳида эътибор қаратилди.
Таъкидланишича, Ўзбекистон миллий сайлов тизимининг ўзига хос жиҳатларидан бири Марказий сайлов комиссиясининг сайловларни ташкил этишдаги ўрни ва аҳамияти босқичма-босқич ошиб бораётгани бўлиб, бу конституцион-ҳуқуқий мақом 2014 йилда сезиларли даражада мустаҳкамланди.
Чиқиш қилганлар 2015 йил 29 декабрда «Ўзбекистон Президенти сайловлари тўғрисида»ги қонунга киритилган ўзгартишларга батафсил тўхталиб ўтди. Ушбу ўзгаришлар 2010 йилда Ўзбекистоннинг Биринчи Президенти Ислом Каримов ташаббусига кўра парламент томонидан қабул қилинган мамлакатда демократик ислоҳотларни янада чуқурлаштириш ва фуқаролик жамиятини шакллантириш концепцияси ҳолатларига асослангани таъкидлаб ўтилди.
Миллий қонунчиликка мувофиқ барча сиёсий партиялар Ўзбекистон Президенти лавозимига ўз номзодларини аниқлади. Марказий сайлов комиссияси қарори билан мамлакатнинг хорижий давлатлардаги дипломатик ваколатхоналарида сайлов участкалари ташкил этилди. Жумладан, бундай участкалар Россиянинг Москва ва Новосибирск шаҳарларида бор.
Бундан ташқари, иштирокчиларга Ўзбекистон–Россия муносабатлари ҳақида маълумот берилди.
Тадбирнинг алоҳида қисми олий таълим даргоҳида таҳсил кўраётган ўзбекистонлик талабаларнинг турмуши ва машғулотларда иштирок этишига доир масалаларга бағишланди.
Изоҳ (0)