Америкалик эксперт iPhone смартфонини Россиянинг янги «Сатана 2» баллистик ракетасидан «минг чандон ақлли» деб атади

АҚШ Энергетика департаментининг ядровий қуроллар бўйича эксперти Роберт Келлининг маълум қилишича, iPhone смартфони Россиянинг янги, «Сатана 2» номи билан танилган РС-28 «Сармат» қитъалараро ракеталаридан минг марта ақллироқдир. Бу ҳақда у NBC News телеканалига берган интервьюсида айтиб ўтди, дея хабар бермоқда «Hi-tech.Mail.ru».

Россиянинг РС-28 «Сармат» ракетаси устидаги ишлар 2011 йили бошланган. Қитъалараро баллистик мажмуа жаҳондаги энг кучли ядровий қурол саналади — унинг жанговар заряди қуввати 40 мегатоннага етади.

2018 йилдан бошлаб янги ракета 1970 йилларда «Жанубий» конструкторлик бюроси томонидан ишлаб чиқилган РС-36М «Сатана» модели ўрнини эгаллайди — РС-28 «Сармат»ни «Сатана 2» деб аташлари боиси шундан.

Бироқ америкалик экспертнинг фикрича, бир зарбда АҚШнинг Шарқий соҳилини йўқ қилиб юборишга қодир бу ракета ўтмишда қотиб қолган. Хусусан, унинг айтишича, «Сатана 2»нинг электрон қисмлари 1970 йиллар даражасида қолган.

Россиянинг янги ракеталари ҳақида америкалик эксперт, жумладан, шундай дейди:«Ракета босиб ўта оладиган масофа, унинг вайронкор портлаш кучи худди аввалгисидек бўлади, бироқ унинг нишонларни уришдаги ишончлилиги ва тез ўзгариши олишини ошириш зарур. Бу ракета тизимлари илк бор 1970 йилларда ишлаб чиқилган, шу сабабли ҳам ҳозир битта iPhone’нинг ўзи бу ракеталардан кўра минг марта кўп иш қила олади. Ўша даврнинг кўплаб беўхшов электрон схемалари ҳозир ҳеч қаерда мавжуд эмас ва одамлар бу схемаларни қаердан топиш мумкинлигини ҳам билмайди».

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.