Тошкент шаҳар бодибилдинг ва фитнесс федерацияси президенти, бодибилдинг бўйича қатор мусобоқалар совриндори, спорт устаси, айни вақтда фильмларда рол ҳам ўйнаётган Ҳабибулла Низомов журналист Феруз Муҳаммадга интервью берди.
— Бодибилдинг билан неча йилдан бери шуғулланасиз?— Бу йилни ҳам ҳисобга киритадиган бўлсак, 11 йил бўлади.
— Шоу-бизнес вакилларининг кўпчилигига сизни мураббий дейди. Хусусан, хонанда Озодбек Назарбеков, актёр Улуғбек Қодиров бодибилдинг қонун-қоидаларини сиздан ўргангани ростми?— Бундан тўрт йилча аввал Озодбек Назарбековга спорт дўконидан машқ анжомларини танлаб, унда фойдаланиш қоидаларини ўргатганим рост. Аммо уларга доимий мураббийлик қилмайман. Уларни инсон сифатида ҳам, санъаткор сифатида ҳам жуда ҳурмат қиламан. Ҳар кўришганимда шуғулланишга вақтлари бўлмаганига шама қилиб, «Спорт анжомлари мендан хафа», деб қўядилар. Улуғбек Қодировга эса ростдан ҳам мураббийлик қиламан, ҳар куни қандай машқлар бажараётгани, қандай овқат истеъмол қилаётганини назорат қилиб бораман. Шунга яраша Улуғбекда натижа ҳам анча яхши. Агар Озод ака ҳам доим шуғулланиб борганида, уларда ҳам натижа жуда яхши бўлар эди.
— Сизнинг мураббийлигингиз остида жуда ҳам яхши натижаларга эришган шоу-бизнес вакили борми?— Бодибилдинг билан шуғулланишга энди аҳд қилган вақтида Жаҳонгир Позилжонов жуда озғин эди. Аммо у яхшигина шуғулланиб, 11 килограмм вазн йиққан.
— Сиз ҳам мураббий ёрдамида шуғуллана бошлаганмисиз ёки ўзингиз билганингизча ҳаракат қилаверганмисиз?— Мураббий ёрдами билан ҳаракат қилганман, албатта. Бахтимга жуда ҳам яхши мураббийлар учраган. Мураббийларим мендан ҳатто пул ҳам олмаган, барча сир-асрорларини ўргатишган. Ўзим ҳам бу спортни жуда яхши кўриб шуғулланганман. Мушакларим ривожланиб кетса ҳам, жисмоний кучли бўлсам ҳам, бировнинг танини ҳам, дилини ҳам оғритмаганман. Ҳалигача кўп жойларда: «Урушасизми, кимнидир уриб ағдарганмисиз?», деб кўп савол беришади. Мен ҳеч қачон, ҳеч кимга кучимни кўрсатмаганман, кўрсатмайман ҳам. Қачонки ўзимга ёки оиламнинг шаънига тегадиган гап бўлса, ўшанда ҳам ўзимни ҳимоя қилиш учун, тушунтириб қўйишим мумкин.
— Бугун кўпчилик ёшлар бодибилдингга қизиқиш билдирмоқда. Улар тезроқ натижага эришиш, мушакларини кўрсатиш учун турли кимёвий моддаларни ҳам истеъмол қилади. Бунинг оқибати аянчли ҳолатларга олиб келганини ҳам видеороликлар орқали кўрганмиз. Бу борада ёшларга қандай маслаҳатлар берасиз?— Биз машқ қилаётган вақтларда мазкур спорт тури ҳали ривожланмаган эди. Машқ қилаётган залларимиз ҳам бугунги кундаги залларга қараганда анча аянчли ҳолда бўлган. Шундай шароитда ҳам яхши натижаларга эришганмиз. Бугун эса одатда фақатгина кўринишим яхши бўлсин, мускулларим бақувват бўлиб, танам шишиб юрсин, деб ҳаракат қилишмоқда. Залга келиб, менга қараб: «Қанча вақтда сиздек бўлишим мумкин, икки ойда кўриниш сизникидек бўлиши мумкинми?», деб сўрашади. Ойларни ҳисоблаб юришади, аммо бу нотўғри. Кимёвий моддаларнинг зарарли экани ҳаммага маълум. Уни истеъмол қилиб, шуғулланиб соғлиққа зарар етказгандан кўра, табиий озуқаларни истеъмол қилиб шуғуллангани минг марта яхши натижа беради. Бугун ёшлар жуда меҳнатдан қочадиган бўлиб кетган, уларнинг бели оғримаса-да, бир кунда «качок» бўлиб қолса. Агар шундай фикрда юрганлар бўлса, бу спорт турига яқинлашмаганлари маъқул. Ушбу спорт тури билан профессионал даражада шуғулланадиганлар учун маълум миқдорда кимёвий озуқалардан истеъмол қилиш тавсия этилади. Бу ҳам маълум муддатгача, қачонки ўзининг кучи тугаб, ўсиш кузатилмаганидагина истеъмол қилиш мумкин.
— Қандай табиий озуқаларни тавсия қила оласиз?— Кўпчилик протеинларни зарар, мумкинмас дейди. «Протеин» оқсил кукуни деб таржима қилинади ва унинг зарари йўқ. Авваллари оқсил кукунининг ҳар ерлардан келганини ичиб юрар эдик. Ҳозирда эса ўзим лицензия асосида оқсил кукунларини ишлаб чиқаришни йўлга қўйдим. Унинг ҳеч қандай зарарли томони йўқ, 100 фоиз табиий маҳсулотлардан тайёрланган. Асоси сут зардобини кукуни ёки қуруқ сут, ловия каби табиий маҳсулотлардан тайёрланган.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)